RMG-ის თანამშრომლები პრეზიდენტთან შეხვედრას ითხოვენ

პოლიტიკა - 14:19, 21 Apr, 2015

1268

საქართველოს პრეზიდენტის ადმინისტრაციის მისაღებში RMG-ის საინიციატივო ჯგუფის წარმომადგენლები იმყოფებიან და გიორგი მარგველაშვილთან შეხვედრას ითხოვენ. RMG-ის წარმომადგენლების მოთხოვნების მოსასმენად მათთან პრეზიდენტის საპარლამენტო მდივნის მოადგილე ბესო აბაშიძე და პრეზიდენტის პრესსამსახურის წარმომადგენლები მივიდნენ.

ბესო აბაშიძემ RMG-ის თანამშრომლებს აუხსნა, რომ მოთხოვნები წერილობით უნდა ჩამოეყალიბებინათ და პრეზიდენტის ადმინისტრაციისთვის ოფიციალურად მიემართათ, თუმცა მის ამ შეთავაზებაზე საინიციატივო ჯგუფის წევრებმა უარი თქვეს. მათი თქმით ისინი პრეზიდენტთან შეხვედრას რამდენიმე თვეა უშედეგოდ ცდილობენ.

როგორც RMG-ის საინიციატივო ჯგუფის წევრებმა ბესო აბაშიძეს განუცხადეს საყდრის-ყაჩაღიანი არ არის კულტურული მემკვიდრეობის ძეგლი და ამ საკითხის პოლიტიზირება არ შეიძლება. მათივე თქმით, კომპანია RMG-ის უამრავ თანამშრომელს სამსახურის დაკარგვა ემუქრება.

„გადაეცით პრეზიდენტს, რომ ჩვენ მოვედით იმისთვის, რომ პრეზიდენტი შეგვხვდეს. ჩვენი იმპერატიული მოთხოვნაა მასთან შეხვედრა“, - განუცხადეს RMG-ის თანამშრომლებმა პრეზიდენტის წარმომადგენლებს.

პრეზიდენტის წარმომადგენლებმა კომპანიის თანამშრომლებთან შეხვედრის შემდეგ ჟურნალისტებთან კომენტარი არ გააკეთეს.

რაც შეეხებათ საინიციატივო ჯგუფის წარმომადგენლებს, ისინი განცხადების დაწერას არ აპირებენ. ისინი პრეზიდენტის მისაღებში იმყოფებიან და აცხადებენ, რომ აქვე დაელოდებიან, სანამ პრეზიდენტი არ მიიღებს.