„ნაციონალური მოძრაობის“ გურჯაანის ოფისში გამართულ ბრიფინგზე ზურაბ ჯაფარიძემ კონრეტული პირები დაასახელა, ვინც გუშინდელ დაპირისპირებაში მონაწილეობდნენ.

მისი ინფორმაციით, ესენი არიან ადგილობრივი ხელისუფლების მაღალჩინოსნები.

„ეს პირები არიან: დავით ნიკოლაშვილი - ქონების მართვის სამსახურის უფროსი, გამგეობის ზედამხედველობის სამსახურის უფროსი დურმიშხან ამისულაშვილი, ზაქრო ქაჩლიშვილი - საკრებულოს ინფრასტრუქტურის კომისიის თავმჯდომარე, ლევან ხაზიური - საკრებულოს ქონების მართვის კომისიის თავმჯდომარე, არჩილ გოგიაშვილი - გამგებლის მრჩეველი, მანანა ჯანჯიბუხაშვილი - გამგეობის სოციალური სამსახურის სპეციალისტი, დიმა არევაძე - გამგებლის წარმომადგენელი ქალაქ გურჯაანში, მიხელ ფურცელაძე - საფეხბურთო კლუბ „ალაზნის“ მენეჯერი, გიორგი დვალი - სპორტკომპლექსის თანამშრომელი, რომელის საკრებულოს თავმჯდომარის ბიძაშვილია. დაცვის პოლიციის გუნდს, რომელიც ჩვენ გამოძევებას ცდილობდა, ხელმძღვანელობდა ლევან ცანკაშვილი, რომელიც ლექსო თამაზაშვილის მეგობარია“, - განაცხადა ჯაფარიძემ.

გურჯაანის მაჟორიტარი დეპუტატის გიორგი ღვინიაშვილის ბიუროს კარზე ცოტა ხნის წინ ცოცხი გააკრეს. ასევე ბიუროს შესასვლელთან გაკრული იყო ბანერები წარწერით - „ძირს ნაციონალების სექტა“, „მოშორდეს ღვინიაშვილი“ და ასე შემდეგ. ამ წუთებში ადგილზე „ქართული ოცნების“ აქტივისტები იკრიბებიან. ცოტა ხნის წინ დეპუტატმა გიორგი ღვინიაშვილმა განაცხადა, რომ მისი ბიურო ბლოკირებულია. მისი ინფორმაციით, ადგილობრივი ხელისუფლების წარმომადგენლები ხალხს ავალებენ, რომ ფიზიკურ დაპირისპირებაზე გადავიდნენ „ნაციონალური მოძრაობის“ წევრებთან.