გურჯაანში „ნაციონალური მოძრაობის“ მაჟორიტარ დეპუტატს გიორგი ღვინიაშვილს გამგეობაში დაკავებული ფართის გამოთავისუფლებას სთხოვენ.

როგორც „ნიუპოსტს“ პარტიის ერთ-ერთმა წევრმა ირმა ნადირაშვილმა განუცხადა, ამით ანტიკორუფციული კომისიის მუშაობას ხელს ვერ შეუშლიან.

მისი თქმით, გამგებლის კორუფციულ საქმიანობას ნებისმიერი შენობიდან შეისწავლიან, თუმცა დეპუტატი აქვე განმარტავს, რომ ღვინიაშვილი ფართის გამოთავისუფლებას არ აპირებს.

„დილიდან რამდენიმე საათის განმავლობაში იფიქრეს და გადაწყვიტეს, მოგვმართონ წერილით, რომ დავცალოთ ეს ფართი, მაგრამ ეს ასე მარტივად არ ხდება. ეს არის ღვინიაშვილის ბიურო და მისი დაცლა ასე არ ხდება. აქ კანონით გათვალისწინებული ნორმები მოქმედებს. ცხადია, ჩვენ ასე აქედან ვერ გაგვყრიან. ეს არასწორი გადაწყვეტილებაა, რადგან ამ შენობაში ყოფნა არ გადაწყვეტს გამოვიძიებთ თუ არა გამგებლის კორუფციულ საქმიანობას. ნებისმიერი შენობიდან და ქუჩიდანაც მოვახერხებთ. ისინი ამის მიზეზად ასახელებენ იმას, რომ ეს არის გამგეობის ფართი და გჭირდებაო. მათ ამის უფლება არ აქვს“, - ამბობს ნადირაშვილი.

„ნაციონალური მოძრაობის“ ანტიკორუფციული კომისია მუშაობას გურჯაანიდან იწყებს. ისინი გურჯაანის საკრებულოსა და გამგეობების საქმიანობას შეისწავლიან.

გურჯაანის მაჟორიტარი დეპუტატის გიორგი ღვინიაშვილის თქმით, ანტიკორუფციული კომისიები ყველა რეგიონში შეიქმნება.