"სად არის მაღალი სტანდარტი, რომლის დამკვიდრებისკენ ივანიშვილი მთელ ქვეყანას მოუწოდებს"

პოლიტიკა - 15:20, 20 Apr, 2015

1996

პრეზიდენტის მრჩეველი კახა კოჟორიძე ბიძინა ივანიშვილის ბრალდებებს გამოეხმაურა და განაცხადა, რომ ივანიშვილი თვითონ არ იცავს მაღალ სტანდარტებს და ნებისმიერი კრიტიკა არგუმენტირებული უნდა იყოს.
კოჟორიძის თქმით, შესაძლოა საზოგადოებამ მოისმინოს ბრალდება, რომ რადგან მას კიდურებზე ხუთი თითი აქვს, მიანიშნებდეს მის კავშირზე „ნაციონალურ მოძრაობასთან“.

"მიჩნდება კითხვა, სად არის ის მაღალი სტანდარტი, რომლის დამკვიდრებისკენ ბიძინა ივანიშვილი მთელ ქვეყანას მოუწოდებს. დაველოდოთ დაანონსებულ ფილმს, მაგრამ იმ შემთხვევაში, თუ ეს ფილმი იქნება ამ მსჯელობის გაგრძელება, შეიძლება ისიც მოვისმინოთ, რომ რადგან თითოეულ კიდურზე მაქვს ხუთი თითი, ეს შეიძლება საეჭვოდ მიანიშნებდეს ჩემს კავშირზე "ნაციონალურმოძრაობასთან", რადგან ამ პარტიას პარტიული ნომერი აქვს 5. უნდა შევეხმიანო ეკა გიგაურს, რომ ერთად ვუყუროთ დიდ ეკრანზე ივანიშილის მიერ დაანონსებულ ფილმს. ვისი მოსაზრებაც მის პოლიტიკურ ხედვასთან თანხვედრაში არ მოდის, ივანიშვილის აზრით ყველაზე მარტივი გზა, რომ ამ ადამიანების წინააღმდეგ იმოქმედოს, არის ის, რომ უნდა დააბრალოს "ნაციონალურ მოძრაობასთან" კავშირი. ეს არის მისი მთავარი არგუმენტი, თუ ამას არგუმენტი შეიძლება ეწოდოს. მან ასევე ახსენა საქართველოს პრეზიდენტი და ვერც სხვა პიროვნებებთან მიმართებაში ვერ მოვისმინეთ დამაჯერებელი, არგუმენტირებული კრიტიკა", - განაცხადა კახა კოჟორიძემ.

შეგახსენებთ, რომ ყოფილმა პრემიერ-მინისტრმა ბიძინა ივანიშვილმა ის ადამიანები დაასახელა, რომლებიც, მისი აზრით, "ნაციონალურ მოძრაობას" ემსახურებიან მაგრამ ამას არაღიარებენ. ივანიშვილმა კონკრეტულ პიროვნებებად კახა კოჟორიძე, ეკა გიგაური და ნინო ლომჯარია დაასახელა.