საგარეო საქმეთა სამინისტროს ინფორმაციით, მიმდინარეობს მუშაობა, რომ უკრაინაში დაღუპული ქართველი ჯარისკაცი საქართველოში დროულად გადმოასვენონ.

ამის შესახებ უწყების პრესსპიკერმა დავით კერესელიძემ განაცხადა.

„გადმოსვენების საკითხები გარკვეულ პროცედურებთან არის დაკავშირებული. ვცდილობთ, რომ ეს პროცედურები რაც შეიძლება სწრაფად გავიაროთ იმისთვის, რომ ქართველი მეომრის ნეშტი საქართველოში დროულად გადმოასვენონ. ჩვენი სამინისტრო და უკრაინაში საქართველოს საკონსულო აღნიშნული საკითხის მოგვარებაში ჩართულია, თუმცა გადმოსვენების ზუსტი თარიღის დასახელება ამ ეტაპზე შეუძლებელია“, - განაცხადა კერესელიძემ.

გიორგი ჯანელიძე დონეცკის ოლქის სოფელ შიროკინოსთან მომხდარი შეტევის დროს დაიღუპა.