ეს არის პირველი ნაბიჯები იმისთვის, რომ ცივილიზებული სახელმწიფო გვერქვას- ღარიბაშვილი

პოლიტიკა - 22:40, 17 Apr, 2015

1075

მთავრობის კანცელარიაში „სოლიდარობის ფონდის“ სამეთვალყურეო საბჭოს სხდომა გაიმართა. პრემიერ მინისტრმა ფონდის შესახებ ისაუბრა და განაცხადა, რომ ყველაზე სასიხარულო არის ის ფაქტი, რომ ამ ფონდმა შეძლო რამდენიმე ათეული ადამიანის სოიცოცხლის გადარჩენა. ირაკლი ღარიბაშვილმა ფონდის საქმიანობაში ჩართულ ადამიანებს მადლობა გადაუხადა.

მთავრობის მეთაურის განმარტებით, ფონდის საქმიანობას უკვე შეუერთდა 240 საჯარო უწყების 40 000-ზე მეტი თანამშრომელი და 17 კერძო კომპანია.

„ეს არის სოლიდარული საზოგადოებისკენ გადადგმული პირველი ნაბიჯები, რაც ძალიან მნიშვნელოვანია იმისთვის, რომ ცივილიზებული სახელმწიფო და საზოგადოება გვერქვას. 9 თვის განმავლობაში ფონდში 2 მილიონ 400 ათასი ლარის მობილიზება გახდა შესაძლებელი, რითაც პირველ ეტაპზე პრაქტიკულად გადაიჭრა 22 წლამდე ონკოლოგიური დაავადებების მკურნალობისათვის ფინანსური პრობლემა. დღეისთვის დამტკიცებულია 86 ბავშვისა და ახალგაზრდის დიაგნოსტიკისა და მკურნალობის სრული დაფინანსება. უკვე არსებობენ კონკრეტული ბავშვები და ახალგაზრდები, რომელთა მკურნალობაც ფონდმა დააფინანსა და მათი სიცოცხლე გადაარჩინა,“–აღნიშნა პრემიერმა.

მისივე თქმით, ფონდში მობილიზებული თანხები არ არის საკმარისი იმისათვის, რომ ყველა იმ ბავშვის და ახალგაზრდის მკურნალობა დაფინანსდეს, რომელთა სიცოცხლესაც საფრთხე ემუქრება.

„ამიტომ უნდა მოვუწოდოთ ყველას, რაც შეიძლება მეტი ადამიანი ჩაერთოს ფონდის საქმიანობაში, უფრო მეტი ადამიანის სიცოცხლის გადასარჩენად; რაც ძალიან მნიშვნელოვანია იმ კუთხითაც, რომ ეს არის კონკრეტული ნაბიჯები სოლიდარული სახელმწიფოს შექმნისკენ,“–განაცხადა ირაკლი ღარიბაშვილმა.

„სოლიდარობის ფონდის“ საქმიანობის ანგარიში მთავრობის მეთაურს ფონდის ხელმძღვანელმა მარიამ ჯაშმა წარუდგინა.

სამეთვალყურეო საბჭოს სხდომას მთავრობის წევრები და ბიზნესის წარმომადგენლები დაესწრნენ.