გადედლებული ცნობიერება

პოლიტიკა - 18:54, 15 Apr, 2015

1182

რამდენიმე დღის წინ ტელეკომპანია ,,მაესტროს“ სიუჟეტი ვნახე, რომელიც მოქვის სახრებას ეხებოდა. ჟურნალისტმა ის ქართულ-აფხაზური კულტურის ძეგლად გამოაცხადა. რა ხდება ასეთი ჩვენს ცნობიერებაში,რომ ვერაფრით ვერ მოვშორდით ამ ფსევდომეგობრობისა და ფსევდოჰუმანიზმის კლიშეებს. ალბათ, ასე უფრო კომფორტულად ვგრძნობთ თავს. მიმტევებლებიც ვართ, მგლის თავზე სახარების მკითხველიც,მარცხენა ლოყასაც ვუშვერთ და მსოფლიოც უკეთ გაგვიგებს. წითელი კოჭების გაგორება ხომ ოდითგანვე მოგვსდევს დამპყრობლისა თუ ვინც კი ვინმე მისი ლაქიისადმი, სადღეგრძელოს ხომ ვეტყვით ბატონკაცურ-დარდიმანდულს,გავაფრენთ მშვიდობის ჩიტებს ხოლმე ენგურის ხიდზე და ამით გულაჩუყებულები საკუთარ შვილებს ვალმოხდილებისა და ღირსების გაკვეთილებსაც ვუტარებთ. ბოდიშზე და თავზე ნაცრის წაყრაზეცგადავუკრავთ ხოლმე მათ და დავდივართ ასე თავაწეულები და კმაყოფილები.

ფარისევლობა ჰქვია ამას, ფარისევლობა და უგნურება!

ვინ ეტყვის ებრაელს, ჰოლოკოსტზე ბოდიში უმდა მოიხადო, ან ამერიკელს იგივეს- 11 სექტემბერზე. გაცემა გაჭირვებულისთვისაა, მაშინ არის მადლი და შენი. მაგრამ ვინაობას, ღირსებასა და რწმენას არ გასცემენ. არც სამშობლოს არავისზე და არაფრის ფასად, არც ისტორიას.

ქართულ-აფხაზური ისეთივე უაზრობაა, როგორც ქართულ-იმერული ან ქართულ-აჭარული, ქართულ-მეგრული ან ქართულ-კახური. თუ სხვა რამეს ამ რიგიდან არ ვუშვებთ, ქართულ-აფხაზურს რატომ ველაციცებით. ან კიდევ თუ ისტორიული გონებაამღვრეულობის გამო აფხაზურს ქართულისგან განვარჩევთ, ქართულად შექმნილი წერილობითი ძეგლი, როგორ არის სხვა ტომის კულტურაც.

ერთხელ ,,დიადი საბჭოეთის“ დროს ცნობილი ქართველი ხელოვნებათმცოდნის სქელტანიან და კარგად დასურათებულ წიგნში ამოვიკითხე ასეთი ფრაზა: ,,ქართული არქიტექტურის აფხაზური სკოლა“. ანბანს იქით სკოლა არა აქვთ, ისიც კირილიცაზეა, მხოლოდმე-19 საუკუნის 60-იანი წლებიდან შეუქმნეს რუსებმა და ეს არქიტექტურული სკოლა საიდან, შე მამაცხონებულო? საიდან და ჩვენგან, ფეშქაშად, დაუმსახურებელი პატივის დასადებად, ძმობისა და მეგობრობის ყალბი ფერხულისათვის, შემდგომ რომ ტყვიებად შემოგვიბრუნდა.

გადედლებამ, ,,ბაბაიას“ ფეხებთან გართხმამ იცის ასე, ადრე და ეხლაც. გახსოვთ, მოსეს რომ უყიჟინებდნენ, უკან დავბრუნდეთ ეგვიპტეშიო, - ის ჰქვია ამას.

ნუთუ მართლა 40 წელი უნდა ვიხეტიალოთ უდაბნოში მონობითა და უმეცრებით სულწამხდარებმა.

მალხაზ პატარაია

მოძრაობა ,,დაბრუნების“ თავმჯდომარე