სახელმწიფო სამხედრო-სამეცნიერო ტექნიკურმა ცენტრმა „დელტამ“ სეტყვასაწინააღმდეგო სისტემა შექმნა. კახეთის რეგიონში სასოფლო-სამეურნეო ნაკვეთებში სეტყვისაგან მიყენებული ზარალი 80-90%-ით შემცირდება.

დღეს, სისტემის პრეზენტაცია სოფელ ნუკრიანში გაიმართა. ღონისძიებას საქართველოს პრემიერ-მინისტრი ირაკლი ღარიბაშვილი და თავდაცვის მინისტრი მინდია ჯანელიძე, ასევე, ეკონომიკისა და მდგრადი განვითარების მინისტრი გიორგი კვირიკაშვილი, სსტც „დელტას“ დირექტორი უჩა ძოძუაშვილი და კახეთის გუბერნატორი დაესწრნენ.

სეტყვასაწინააღმდეგო სისტემის შექმნა კახეთის რეგიონში სასოფლო-სამეურნეო ნაკვეთებში სეტყვისგან მიყენებული ზარალის შემცირებას ისახავს მიზნად. რადარი სოფელ ნუკრიანში, ჭოტორის მთაზეა განთავსებული, საიდანაც 83 საცეცხლე წერტილი იმართება.

კომპლექსის შემადგენლობაში შედის: ცენტრალური სარადარო სადგური -მეტეორადარი, ინფორმაციის დამუშავებისა და ცეცხლის მართვის ცენტრი, ასევე ავტონომიური საცეცხლე სარაკეტო დანადგარები. პროექტის ღირებულება 14 მილიონ ლარს აღემატება.

სამხედრო-სამეცნიერო ტექნიკური ცენტრი „დელტა“ საქართველოს თავდაცვის სამინისტროს 2015 წლის 8 აპრილს საქართველოს მთავრობის N 164 დადგენილების შედეგად დაუბრუნდა.