თემურ ჩხაიძე:"ძალიან დაღლილი ვიყავი... ღამე იყო და ვერ დავინახე"

პოლიტიკა - 18:53, 14 Apr, 2015

5418

ლანჩხუთის მაჟორიტარი დეპუტატი ,,გურიის მოამბე" სთან საუბრისას, ბოლოდროინდელ სკანდალს იხსენებს, რომელშიც მისი სახელი ფიგურირებდა.

დეპუტატი იმ საბედისდისწერო დღეს იხსენებს როცა, ის საკუთარ ავტომანქანაზე საჭესთან მჯდომი, ფეხით მოსიარულეს დაეჯახა:

"ინციდენტი შებინდებისას მოხდა, საბედნიეროდ ყველაფერი კარგად დამთავრდა. ადამიანები ვართ და რაღაც დამემართა. გავრცელებული ინფორმაცია, რომ თითქოს ნასვამი ვიყავი არასწორია. მარხვაზე ვიყავი და მითუმეტეს ბოლო კვირა ვნების კვირა იყო. ძალიან დაღლილი ვიყავი და მოხდა ისე, რომ ღამე იყო და ვერ დავინახე, რადგან მხედველობის პრობლემა მაქვს. ამიტომ ყოველთვის ვცდილობ იმას, რომ ღამე არ მომიწიოს მგზავრობა. საბედნიეროდ ყველაფერი კარგად დამთავრდა და დღეს პაციენტი კარგად არის" - იხსენებს თემურ ჩხაიძე.

პარლამენტარმა კომენტარი ქვეყნის პრემიერ-მინისტრის განცხადებაზეც გააკეთა :"სხვა რაღაცაზე იყო საუბარი. კერძოდ ჩაშლილ ტენდერებზე.

ჩვენ ამ რამდენიმე დღის წინ ვიყავით კაჯრეთში შეხვედრაზე, სადაც პარტიის წევრების გადახალისება მიმდინარეობდა და იქ პრემიერმა ლანჩხუთი მოწინავე რაიონებს შორის დაასახელა. იგივე ინფრასტრუქტურული პროექტების კუთხით, სადაც ჩაბარების ხარისხი არის ძალიან მაღალი. მოვა დრო და ყველა დაინახავს, რომ ჩვენთან ბევრი სასიკეთო საქმე კეთდება"თქვა დეპუტატმა.

ცნობისათვის-ნასვამი პარლამენტარი მოქალაქეს დაეჯახა და მიიმალა

საქართველოს საპარლამენტო უმრავლესობის წევრი, ლანჩხუთის მაჟორიტარი დეპუტატი, თემურ ჩხაიძე, წუხელ, ნასვამ მდგომარეობაში მყოფი, ლანჩხუთის მუნიციპალიტეტის სოფელ ლესაში, ამავე სოფლის მკვიდრს, ზვიად ფუტკარაძეს დაეჯახა და ადგილიდან მიიმალა.

დაზარალებული ლანჩხუთის მედალფას კლინიკაში მოათავსეს.

როგორც "გურიის მოამბეს" კლინიკის მენეჯერის მოადგილემ , რევაზ კვერენჩხილაძემ განუცხადა, ფუტკარაძე უკვე საავადმყოფოდან გაწერილია, მისი შემოყვანის მიზეზი ავტოსაგზაო შემთხვევა გახდა.

ოფიციალურად ინფორმაციას, რომ მანქანას, რომელიც მოქალაქეს დაეჯახა, ნასვამ მდგომარეობაში მყოფი დეპუტატი მართავდა, სოფლის მოსახლეობა ავრცელებს.

ჩხაიძე ტელეფონის ზარებს არ პასუხობს.

ინფორმაცია აღნიშნული ფაქტის შესახებ "გურიის მოამბეს" დღეს, ადრე დილით, ლანჩხუთიდან მოაწოდეს.

რედაქცია იმ წუთში ვე სოფელ ლესის მაჟორიტარს, ელისო ჭიჭინაძეს დაუკავშირდა:"ხო, გასაგებია, თქვენ ვინ ბრძანდებით?... ვერაფერს ვერ გეტყვით, მე ახლა წამოვედი მედალფას კლინიკიდან და არ ვიცი მდგომარეობა, იქნებ მენეჯერს დაუკავშირდეთ. ავტოსაგზაო შემთხვევა? არ ვიცი არაფერი გამიგია"-გვპასუხობდა ლანჩხუთის საკრებულოს წევრი.

რედაქცია შემდეგ ლანჩხუთის ე.წ. "ძველ საავადმყოფოს" ხელმძღვანელობას დაუკავშირდა:"გუშინ ჩვენთან ავტოსაგზაო შემთხვევის შედეგად დაზარალებული არ შემოუყვანიათ"-გვიპასუხეს საავადმყოფოში.

"გურიის მოამბე" მედალფას კლინიკის პერსონალს დაუკავშირდა:"ჩვენ ვერაფერს გეტყვით, იქნებ მენეჯერს დაუკავშირდეთ"-იყო პასუხი.

დაუკავშირდით კლინიკის მენეჯერს:"იცით მე თვითონ მაქვს ხელი მოტეხილი და არაფერი არ ვიცი, იქნებ ჩემს მოადგილეს დაუკავშირდეთ"-და გვაძლევს მისი მოადგილის ნომერს:-ნომერი არ ფუნქციონირებს.

ერთერთი თანამშრომლიდან მოვიპოვეთ მენეჯერის მოადგილის ნომერი:"იცით წერილობით უნდა მომმართოთ და გადავწყვეტთ გიპასუხოთ თუ არა"-გვიპასუხა მოადგილემ.

"გურიის მოამბე" "რას ამბობთ? ასეთი რამ პრაქტიკაში არ ყოფილ-ჩვენ გვაინტერესებს დაზარალებულის მდგომარეობა მხოლოდ და მიზეზი რის გამოც მოიყვანეს კლინიკაში"

მენეჯერის მოადგილე:"მოგვმართეთ წერილობით"

"გურიის მოამბე""ახლავე დავუკავშირდებით თქვენს ხელმძღვანელობას"

მენეჯერის მოადგილე:"მოიცათ, მოიცათ, ზვიად ფუტკარაძე შემოიყვანეს გუშინ, დაზიანებები მიყენებული ჰქონდა ავტოსაგზაო შემთხვევის შედეგად, გაეწია შესაბამისი მკურნალობა და გაწერილია ბინაზე, იმყოფება ექიმის მეთვალყურეობის ქვეშ".

როგორც შინაგან საქმეთა სამინისტროდან გვაცნობეს, ავტოსაგზაო შემთხვევის ფაქტზე დაწეყებულია გამოძიება სსკ-ის 276 მუხლით.

წყარო: გურიის მოამბე