შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი აცხადებს, რომ გალში ქართული ენის სწავლების აკრძალვაზე საუბარი არ არის.

ამის შესახებ ზაქარეიშვილმა „ნიუპოსტთან“ საუბარში განაცხადა.

მისი თქმით, ის ოკუპირებული აფხაზეთის ტერიტორიაზე არსებული სკოლების დირექტორებს და მასწავლებლებს ესაუბრა, რომლებმაც დაუდასტურეს, რომ მსგავსი პრობლემა არ არსებობს.

„ჩვენ ვესაუბრეთ მასწავლებლებსაც, დირექტორებსაც და ყველა ამბობს, რომ ქართული ენის სწავლების აკრძალვაზე საუბარი არ ყოფილა. ამიტომ კარგი იქნება, თუ ის მასწავლებლები, ვისაც თქვენ ესაუბრებით, ჩამოვლენ და ჩვენც დაგვლაპარაკებიან. ჩემთან შეხვედრის პრობლემა არ არსებობს. ვისაც ჩვენ ველაპარაკებით, ყველა ცალსახად ამბობს, რომ ქართული ენის სწავლების აკრძალვაზე საუბარი არ არის. სხვადასხვა ინფორმაცია ვრცელდება ამ თემაზე. თუ არიან ადამიანები, ვინც გალის რაიონში ცხოვრობენ, მათ აქვთ კონტაქტები სკოლებთან და აქვთ სურვილი ინფორმაცია მომაწოდონ, მე მზად ვარ, ჩავიდე ზუგდიდში და დაველაპარაკო მათ. 20 წელია, ამ სფეროში ვმუშაობ და ჰიპოთეტურ მოსახლეობაზე დაყრდნობით მათი სახელით ბევრი ცრუ ინფორმაცია მომისმენია. მინდა გავიგო, ვინ არის ინფორმაციის გავრცელების პირველი წყარო. არ არსებობს გალელი, რომ მე არ მიცნობდეს და არ მენდობოდეს. თუ ანონიმურად ახერხებენ პრესისთვის ინფორმაციის მიწოდებას, ჩვენამდე ან განათლების სამინისტრომდე რატომ ვერ ახერხებენ ინფორმაციის მოტანას?" - განაცხადა ზაქარეიშვილმა.

რაც შეეხება აფხაზეთში არსებულ სკოლებში ისტორიის სახელმძღვანელოს შეცვლას, ზაქარეიშვილი ადასტურებს, რომ ეს პრობლემა გალში ნამდვილად არსებობს.

„რაც შეეხება სახელმძღვანელოებს, ამაზე საუბარი ნამდვილად არის. უნდათ, რომ ჩაანაცვლონ თბილისში დაბეჭდილი სახელმძღვანელოები მოსკოვში ან სოხუმში დაბეჭდილი სახელმძღვანელოებით. არსებობს პრობლემა და მასზე მუშაობა მიდის, მაგრამ ენის შესწავლის აკრძალვის საფრთხე ვერავინ დაადასტურა. კიდევ ერთხელ ვამბობ, დღეს გვაქვს ინფორმაცია, რომ ქართულ ენას არ ემტერებიან. პრობლემებია ისტორიის და გეოგრაფიის სახელმძღვანელოებზე. ამ პრობლემის მოგვარებაში ჩართული არიან საერთაშორისო ორგანიზაციები და გვაქვს ხედვები, თუ როგორ გამოვიდეთ მდგომარეობიდან“, - განაცხადა ზაქარეიშვილმა.

ნინო დათაშვილი