საქართველოს პრემიერმინისტრი - ირაკლი ღარიბაშვილი დანიის, შვედეთის და პოლონეთის საგარეო საქმეთა მინისტრებს შეხვდა.

შეხვედრის ძირითადი თემები: საქართველოს ევროპული გზა, თანამშრომლობა ნატო-სა და ევროკავშირთან და რიგის აღმოსავლეთ პარტნიორობის სამიტის პერსპექტივები იყო.

მარტინ ლიდეგორდმა, მარგოთ ვოლსტრომმა და გჟეგოჟ სხეტინამ ირაკლი ღარიბაშვილს კიდევ ერთხელ დაუდასტურეს მზადყოფნა, მხარი დაუჭირონ საქართველოს, როგორც აღმოსავლეთ პარტნიორობის მნიშვნელოვან წევრ სახელმწიფოს, ვიზის ლიბერალიზაციის საკითხის წარმატებით გადაწყვეტაში.
პრემიერმა საგარეო საქმეთა მინისტრებს საქართველოს ევროპული მისწრაფებების, ტერიტორიული მთლიანობისა და სუვერენიტეტის მხარდაჭერისთვის მადლობა გადაუხადა.

ირაკლი ღარიბაშვილმა შეხვედრისას ხაზგასმით აღნიშნა, საქართველოს ევროპული და ევროატლანტიკური კურსი შეუქცევადობა. მან ასევე ხაზი გაუსვა საქართველო-პოლონეთს შორის გაფორმებული მემორანდუმის მნიშვნელობას, რომელიც თანამშრომლობის სრულიად ახალ ფორმატს - თბილისის დეკლარაციას აფუძნებს და საქართველოს ევროპული და ევროატლანტიკური მისწრაფებების განხორციელებაში პოლონეთის როლის ამაღლებას გულისხმობს.

შეხვედრაზე საუბარი შეეხო რუსეთის მიერ აფხაზეთისა და ცხინვალის რეგიონის დე-ფაქტო რეჟიმებთან მოკავშირეობის შესახებ ე.წ შეთანხმებების გაფორმებას და საოკუპაციო ზოლის მიმდებარე ტერიტორიებზე არსებულ ვითარებას.

მხარეებმა ასევე ისაუბრეს საქართველოს ორმხრივი თანამშრომლობის გაღრმავებაზე იმ ქვეყნებთან, რომელთა საგარეო საქმეთა მინისტრები თბილისს სტუმრობენ.