პანკისიდან სირიაში გაგზავნილი 18 წლის ბესლან მარგოშვილი საქართველოში დაბრუნდა

პოლიტიკა - 16:36, 13 Apr, 2015

6911

კახეთის საინფორმაციო ცენტრის ინფორმაციით, პანკისის ხეობიდან 2015 წლის 12 იანვარს სირიაში გაგზავნილი 18 წლის ბესლან მარგოშვილი საქართველოში დაბრუნდა. ეს ინფორმაცია კახეთის საინფორმაციო ცენტრს ბესლან მარგოშვილის მშობლებმა ნოდარ და მანანა მარგოშვილებმა დაუდასტურეს.

ბესლან მარგოშვილი, რომელიც პანკისის ხეობაში დღეს, დილით დაბრუნდა, ინტერვიუზე უარს ამბობს. მანანა მარგოშვილის თქმით, ბესლანმა ოჯახის წევრებს უთხრა, რომ ის თურქეთში იმყოფებოდა და სირიაში არ გადასულა.

კახეთის საინფორმაციო ცენტრმა ბესლან მარგოშვილთან დაკავშირებით ინფორმაცია 2015 წლის 23 თებერვალს გაავრცელა. 18 წლის ბესლან მარგოშვილს ოჯახის წევრები 2015 წლის 12 იანვრიდან ეძებდნენ.

„12 იანვარს გავიდა სახლიდან და მას შემდეგ არ მინახავს. შუადღის ორი საათი იყო სახლში რომ მოვედი, გოგოს ვკითხე, ბესლანი სად არის მეთქი და გავიდაო, ომალოში მივდივარო ასე უთქვამს. იმის შემდეგ არ დაბრუნებულა. ქალაქში ერთხელაც არ არის ეგ ბიჭი ნამყოფი. არცერთი საბუთი არ ჰქონდა, პირადობის მოწმობაც სახლში გვაქვს. ფული არ ჰქონდა, ისეა გასული. მეორე დღეს დამირეკა, დედა, მე თურქეთში ვარო“, – უთხრა კახეთის საინფორმაციო ცენტრს ბესლან მარგოშვილის დედამ, მანია ფარეულიძემ.

შეგახსენებთ, რამდენიმე თვეა პანკისის ხეობიდან სირიაში ახალგაზრდების გაგზავნა განახლდა. 16 წლის მუსლიმ კუშტანაშვილი და 18 წლის რამზან ბაღაკაშვილი პანკისის ხეობიდან სირიაში 2 აპრილს წაიყვანეს. ფოტოზე, რომელიც კახეთის საინფორმაციო ცენტრმა მოიპოვა, სწორედ ისინი არიან აღბეჭდილები ტერორისტულ ორგანიზაციად წოდებული „ისლამური სახელმწიფოს“ დროშის ფონზე. ახალგაზრდებს ხელში „კალაშნიკოვის“ ტიპის ავტომატები უჭირავთ. არსებული ინფორმაციით, საქართველოდან სირიაში გაგზავნილი სკოლის მოსწავლეები ე.წ. „ისლამური სახელმწიფოს“ ერთ–ერთი ლიდერის, თარხან ბათირაშვილის დაჯგუფებაში არიან.

წყარო: კახეთის საინფორმაციო ცენტრი