,,ბადაშვილი ინსტრუმენტია ივანიშვილის ხელში“ - მთავარ პროკურორს პარლამენტში იბარებენ

პოლიტიკა - 15:46, 13 Apr, 2015

1756

მთავარ პროკურორს პარლამენტში იბარებენ. გიორგი ბადაშვილის საკანონმდებლო ორგანოში მისვლას თავისუფალი დემოკრატები ითხოვენ. ალასანიას გუნდის პოზიციას იზიარებენ ნაციონალურ მოძრაობაშიც.

თავისუფალ დემოკრატებსა და ნაციონალურ მოძრაობას შორის ამ საკითხთან დაკავშირებით უკვე შედგა კონსულტაციები. ყოფილი სახელისუფლო გუნდი მხარს უჭერს ალასანიას გუნდის მოთხოვნას, მთავარი პროკურორის პარლამენტში მისვლასთან დაკავშირებით. დეპუტატების საკითხის დაყენებას მიმდინარე კვირას პლენარულ სხდომაზე გეგმავენ.

დეპუტატების ძირითადი დაინტერესება პროკურატურაში რამდენიმე თვის წინ შექმნილ დეპარტამენტს უკავშირდება. ოპოზიციას აინტერესებს რა მიზანს ემსახურებოდა აღნიშნულილ დეპარტამენტის შექმნა. ოპოზიციას ეჭვი აქვს, რომ დეპარტამენტი პოლიტიკური ბრძოლის კიდევ ერთი იარაღია.

,,მთავარი პროკურორი მოვიდეს პარლამენტში და პარლმენტის წინაშე გააკეთოს მოხსენება, თუ რა ხდება ახალი დეპარტამენტის შექმნიდან დღემდე და რა მიზანს ისახავს. მხოლოდ განცხადებების დონეზე ვიცით, რომ ეს იქნება დაკავშირებული სამართლიანობის აღდგენასთან. ეს უნდა აინტერესებდეს არა მარტო ოპოზიციას, არამედ დღევანდელ უმრავლესობასაც, თუ როგორ აპირებს დღევანდელი პროკურატურის ახალგაზრდა გუნდი ამ მნიშვნელოვანი ფუნქციისთვის თავის გართემვას“ - აცხადებს ზურაბ აბაშიძე.

"ამ დეპარტამენტის შექმნა, როგორც აჩვენებს მთელი ეს გასული დრო, არის აუცილებელი მხოლოდ იმისთვის, რომ პოლიტიკური დევნა განახორციელოს, სხვა მიზნები მას არ აქვს. ბადაშვილი არის მხოლოდ ინსტრუმენტი, მხოლოდ მომსახურე პერსონალი ბიძინა ივანიშვილის ხელში," - აცხადებს სერგო რატიანი.

უმრავლესობის წევრი ეკა ბესელია ვერ ხედავს ბადაშვილის პარლამენტში მისვლის აუცილებლობას, როგორც დეპუტატი აცხადებს, რომ ადამიანის უფლებათა დაცვის კომიტეტს ისედაც მჭიდრო ურთიერთობა აქვს პროკურატურის დეპარტამენტთა.

შეგახსენებთ, რომ პროკურატურაში აღნიშნული დეპარტამენტი რამდენიმე თვის წინ შეიქმნა და პრეზენტაციაზე ითქვა, რომ განსაკუთრებული ყურადღება დეპარტამენტის საქმიანობისას დაეთმობა უკანონოდ ჩამორთმეულ ქონებას და არადამიანური მოპყრობისა და წამების ფაქტებს, რომელშიც, უწყების განმარტებით, საჯარო მოხელეები იყვნენ მხილებული.