პრემიერი ირაკლი ღარიბაშვილი შინაგან საქმეთა მინისტრს და უწყების თანამშრომლებს შალვა აბულაძის დაკავების ოპერაციის ეფექტიანად ჩატარებისთვის მადლობას უხდის.

ამის შესახებ ირაკლი ღარიბაშვილის მიერ გავრცელებულ განცხადებაშია ნათქვამი.

„პოლიციელების - ბექა მარგიშვილისა და გიორგი ბერუაშვილის მკვლელობასა და ვალერიან გრძელიშვილის და გიორგი მახარაშვილის დაჭრაში მთავარი ეჭვმიტანილი შალვა აბულაძე დაკავებულია და ეს არის ძალიან მნიშვნელოვანი მთელი ჩვენი საზოგადოებისათვის.

ამ დანაშაულის ჩადენაში მთავარი ეჭვმიტანილის დაკავება იყო ჩვენი ხელისუფლების ღირსების საქმე.

მინდა მადლობა გადავუხადო შინაგან საქმეთა სამინისტროს, პირადად მინისტრს და თითოეულ პოლიციელს დაკავების ოპერაციის ოპერატიულად და ეფექტიანად ჩატარებისთვის.

სახელმწიფო არავის შეარჩენს დანაშაულს და ყველა დამნაშავე დაისჯება კანონის მთელი სიმკაცრით“, - ნათქვამია განცხადებაში.