უზენაესი სასამართლოს თავმჯდომარე შვეიცარიის ელჩთან შეხვედრას გეგმავს

პოლიტიკა - 13:25, 10 Apr, 2015

1376

საქართველოს უზენაესი სასამართლო საქართველოში შვეიცარიის ელჩის გიუნტერ ბეხლერის განცხადებას ეხმაურება, რომელიც მან ჟურნალ „FINANCIAL“ -ისთვის მიცემულ ინტერვიუში გააკეთა. ელჩის განცხადებით: „გადასახადებთან დაკავშირებული ბრალდებები და რეგიონში მოსამართლეების გახსნილობა ქრთამის მიმართ გავლენას ახდენს საქართველოში მომუშავე უცხოელ ინვესტორებზე“.

უზენაესი სასამართლოს თავმჯდომარე ელჩის ინტერვიუს ოფიციალურად გამოეხმაურა და ამომწურავი ინფორმაციის მიღების მიზნით, თუ რა ფაქტებს და გარემოებებს ეყრდნობოდა ელჩი, მასთან შეხვედრის სურვილი გამოთქვა. თუმცა იმის გამო, რომ დიპლომატი საქართველოში არ იმყოფება, შეხვედრა ამ ეტაპისთვის ვერ შედგა.

უზენაესი სასამართლოს განცხადებით ნინო გვენეტაძე მოსამართლეთა კორპუსთან და იუსტიციის უმაღლესი საბჭოს წევრებთან ერთად უახლოეს მომავლში გიუნტერ ბეხლერთან შეხვედრას გეგმავს.

"უზენაესი სასამართლოს თავმჯდომარე ღიაა დიალოგისთვის და პრობლემებზე საუბრისთვის, ამავე დროს, განსაკუთრებული ყურადღება მიექცევა ყველა გავრცელებულ ინფორმაციას, რომელიც მართლმსაჯულების მიმართ საზოგადოების ნდობის განმტკიცებას ემსახურება. შვეიცარიის ელჩთან შეხვედრის დეტალების დაზუსტების შემდეგ სასამართლოს ადმინისტრაცია საზოგადოებას დამატებით ინფორმაციას მიაწვდის." ნათქვამია უწყების განცხადებაში