"მე ვარ ერთადერთი მათგანი, ვინც აკმაყოფილებს ილიას სიტყვებს"- ივანიშვილი

პოლიტიკა - 19:38, 09 Apr, 2015

8772

ყოფილი პრემიერი უარყოფს მის მიმართ გამთქმულ პრეტენზიებს და აცხადებს, რომ ის მთავრობას კულისებიდან არ მართავს. მისი თქმით მისი და ქვეყნის ინტერესები ერთმანეთს ემთხვევა და გაუგებარია, რა აშფოთებთ მათ ვინც მას აკრიტიკებს. ამასთანავე ივანიშვილი აცხადებს, რომ ის სრულიად აკმაყოფილებს ილია ჭავჭავაძის მიერ გამოთქმულ მოსაზრებას, რომ „ყველამ ერთად და თითოეულმა ცალკე უნდა გავიზიაროთ, რომ ნაწილი ვართ ერისა და საკუთარი წარმატება უნდა ვეძებოთ ჩვენი ერის წარმატებაში.“

"ღარიბაშვილი იშვიათად მირეკავს. რასაც ამბობენ, არის გადაჭარბებული. მრავალჯერ ვთქვი და კიდევ გავიმეორებ: არ ვმართავ კულისებიდან მთავრობას. მთავრობას მართავს მთავრობის მეთაური, იშვიათად თუ დამირეკავენ და რჩევას მკითხავენ, ეს ნორმალურია და მთელს მსოფლიოში ხდება... მთავრობაში არავინაა ჩემი ნათესავი და არც ვინმესთან ვმეგობრობ მათში, ვინც დღეს მთავრობაშია. შესაბამისად, ესეც სიცრუეა. საზოგადოებაში მაქვს დიდი ნდობა და იციან ჩემი პრინციპული პოზიცია, რომ ყველასგან ვითხოვ კანონის დაცვას. როგორც მოქალაქე ხმას ამოვიღებ და ჩემს ხმას ძალა ექნება. აქედან გამომდინარე, ამას დიდ ანგარიშს უწევენ და ის, ვისაც კანონის დარღვევის სურვილი აქვს, ჩემს მიმართ აგრესიულია იმიტომ, რომ საფრთხეს წარმოვადგენ მათთვის, რომ შეიძლება ხმა ამოვიღო...მე ვარ ერთადერთი მათგანი, ვინც აკმაყოფილებს ილიას სიტყვებს - ყველამ ერთად და თითოეულმა ცალკე უნდა გავიზიაროთ, რომ ნაწილი ვართ ერისა და საკუთარი წარმატება უნდა ვეძებოთ ჩვენი ერის წარმატებაში, მე ვარ ერთადერთი მათგანი, ვინც ამ წესებს იცავს. თუ ვმართავ მთავრობას და კიდევ ერთხელ ვამბობ, რომ არ ვმართავ, ვაკეთებ ყველაფერს საზოგადოების ინტერესებიდან გამომდინარე, - განაცხადა ბიძინა ივანიშვილმა.