პარლამენტის წინ, 9 აპრილის მემორიალთან პრეზიდენტი გიორგი მარგველაშვილი მეუღლესთან ერთად მივიდა.

გიორგი მარგველაშვილმა, 9 აპრილის მოვლენების დროს დაღუპულ ადამიანთა ხსოვნას პატივი მიაგო და მემორიალი ყვავილებით შეამკო.

მან, 26 წლის წინ მომხდარი ტრაგედიის შესახებ ისაუბრა და მწუხარება გამოხატა მომხდარის გამო.

“1989 წელს აქ დაღვრილი პატრიოტების უმანკო სისხლი ორი წლის მერე საქართველოს დამოუკიდებლობის აქტში გამოიხატა. ბუნებრივია, ჩვენ ყველა წელს პატივს მივაგებთ იმ ადამიანებს, ვინც აქ იცავდა ჩვენს მომავალ სახელმწიფოებრიობას. ბუნებრივია, მადლობას ვუხდით მათ იმ ღვაწლისთვის, რამაც საქართველოს დამოუკიდებლობა მოუტანა. საქართველოს პირველმა პრეზიდეტმა მაშინ ეს აქტი სწორედაც ამ ტრაგიკულ მოვლენებს დაუკავშირა, რითაც ხაზი გაუსვა ჩვენი ქვეყნის დამოუკიდებლობისთვის ბრძოლის ძალიან რთულ და მნიშვნელოვან გზას”, – განაცხადა გიორგი მარგველაშვილმა.

პრეზიდენტთან ერთად 9 აპრილს დაღუპულთა გმირებს პატივი, უშიშროების საბჭოს მდივანმა ირინა იმერლიშვილმაც მიაგო.

რუსთაველის გამზირზე, 9 აპრილის მემორიალთან შეკრებილ საზოგადოებას შორის დაღუპული გმირების ოჯახების წევრებიც იმყოფებოდნენ.