საპარლამენტო უმცირესობის წევრის გივი თარგამაძის განცხადებით, პოლიციელის მკვლელობაში ბრალდებულის შალვა აბულაძის ადგილსამყოფელი შინაგან საქმეთა სამინისტრომ ჯერ კიდევ ბორჯომში ჩადენილი მკვლელობის შემდეგ იცოდა. მის დასაკავებლად სპეცოპერაციაც დაგეგმა, თუმცა სპეცრაზმმა დავალების შესრულებაზე უარი თქვა.

გივი თარგამაძის ინფორმაციით, სპეცრაზმის თანამშრომლებმა ოპერაციაზე გასვლაზე უარი ახსნეს იმით, რომ შეიარაღებული აბულაძისთვის საპასუხო ცეცხლის გახსნა და მისი სავარაუდო ლიკვიდაცია მოუწევდათ. როგორც დეპუტატმა აღნიშნა, სპეციალური დანიშნულების რაზმის წევრებმა გაიხსენეს, რომ განზრახ მკვლელობის ბრალდებით ე.წ. კორტების სპეცოპერაციის საქმის მონაწილე ექვსი სპეცრაზმელი წინასწარ პატიმრობაში იმყოფება. თარგამაძის თქმით, სპეცრაზმელებმა აბულაძის დაკავების ოპერაციაზე სწორედ ამის გამო თქვეს უარი.

შეგახსენებთ, შსს დამამძიმებელ გარემოებებში განზრახ მკვლელობაში ბრალდებულ შალვა აბულაძეს იანვრიდან ეძებს. მან ბორჯომში ერთი პოლიციელი მოკლა და ერთი დაჭრა. რამდენიმე დღის წინ კი, ვარკეთილში მოკლა კიდევ ერთი პოლიციელი ბექა მარგიშვილი.

_{ნინო ზედგენიძე}