"ომის კვალი ადვილად არ ქრება"- ღარიბაშვილი შიდა ქართლს განსაკუთრებულ მხარდაჭერას უცხადებს

პოლიტიკა - 14:43, 08 Apr, 2015

1137

საქართელოს პრემიერ-მინისტრი ირაკლი ღარიბაშვილი "ძლიერი რეგიონი - ძლიერი საქართველოსთვის" პროექტის ფარგლებში, გორის სახელმწიფო უნივერსიტეტში ბიზნესის წარმომადგენლებთან შეხვედრაზე სიტყვით გამოვიდა. ირაკლი ღარიბაშვილმა განაცხადა, რომ შიდა ქართლი სახელმწიფოს განსაკუთრებულ ყურადღებას საჭიროებს, რადგან ომის კვალი ადვილად არ ქრება. ღარიბაშვილის თქმით, დღეს გამართული შეხვდრის მიზანი შიდა ქართლის რეგიონის სწრაფი განვითარების ხელშეწყობაა.

"მთავრობამ რეგიონების გაძლიერება მთავრობამ უმთავრეს პრიორიტეტად გამოაცხადა, ჩვენ თანამიმდევრულად ვდგამთ ნაბიჯებს, რომ რეგიონები გამოცოცხლდეს და მოსახლეობა წელში გაიმართოს. ჩვენ გვაქვს განსაკუთრებული ვალდებულება შიდა ქართლის მიმართ. ამ რეგიონს სახელმწიფოს მხრიდან სჭირდება განსაკუთრებული მხარდაჭერა, ვინაიდან ომის კვალი ადვილად არ ქრება. უბედურება და ტრაგედია, რომელიც დააწვა ადგილობრივ მოსახლეობას ადვილად გადასალახი არ არის. ჩვენ შეძლებისდაგვარად ყველაფერს ვაკეთებთ იმისათვის, რომ შიდა ქართლი მაქსიმალურად მოკლე დროში დადგეს ფეხზე. ჩვენ ვგრძნობთ განსაკუთრებულ ვალდებულებას მათ წინაშე. ჩვენთვის ძალიან მნიშვნელოვანია გამყოფი ხაზის გასწვრივ მცხოვრები ხალხის მხარდაჭერა", - განაცხადა ღარიბაშვილმა.

პრემიერ მინისტრმა შიდა ქართლში განხორციელებული პროექტები მიმოიხილა და განაცხადა, რომ 2012 წლიდან 300 ოჯახს საცხოვრებელი ფართი დაუკანონდა, ხოლო გორში საფუძველი ეყრება 480 ბინიანი კორპუსების მშენებლობას, სადაც დევნილები საკუთარ სახლებში დაბრუნებამდე იცხოვრებენ.