შალვა აბულაძის მიმართ პროკურატურას ექნება უმკაცრესი პოზიცია- ირაკლი შოთაძე

პოლიტიკა - 12:58, 08 Apr, 2015

2269

მთავარი პროკურორის მოადგილის ირაკლი შოთაძის თქმით, შალვა აბულაძეს ბიზნესმენ ბესიკ ხარძიანის მკვლელობასთან კავშირი არ აქვს. ამასთანავე შოთაძის განცხადებით აბულაძესთან მიმართებაში პროკურატურას ექნება უმკაცრესი პოზიცია და საგამოძიებო უწყება შეეცდება, რომ პოლიციელების სასტიკი მკვლელობისთვის აბულაძე უმკაცრესად დაისაჯოს.

„აბულაძის საქმეს იძიებს საქართველოს პროკურატურის თბილისის საგამოძიებო ნაწილი. ამ ეტაპზე ამ საქმეზე ფაქტობრივად შეკრებილია საკმარისი მტკიცებულებები, რაც უტყუარად ადასტურებს, რომ ეს მკვლელობები ჩადენილია შალვა აბულაძის მიერ. ამ ეტაპზე, შინაგან საქმეთა სამინისტროსთან ერთად, მიმდინარეობს ინტენსიური, 24 საათიანი ოპერატიული სამძებრო სამუშაოები ამ პიროვნების ადგილსამყოფელის დადგენის მიზნით. შალვა აბულაძის ადგილსამყოფელს აუცილებლად დავადგენთ და ამ პიროვნებას აუცილებლად დავაკავებთ. მის მიმართ საქართველოს პროკურატურას აუცილებლად ექნება უმკაცრესი პოზიცია და შევეცდებით იგი ამ სასტიკი მკვლელობისთვის უმკაცრესად დაისაჯოს,“ - განაცხადა ირაკლი შოთაძემ.

შეგახსენებთ, გამოძიების ინფორმაციით მიმდინარე წელს შალვა აბულაძემ ლიკანსა და თბილისში პოლიციელებზე თავდასხმა განახორციელა, რის შედეგადაც ორი სამართალდამცავი გარდაიცვალა, ორი კი მძიმედ დაიჭრა.