იარაღის შეძენა თავის მოწონებად არ უნდა ითვლებოდეს- იუსტიციის მინისტრი

პოლიტიკა - 19:19, 07 Apr, 2015

1250

იუსტიციის მინისტრი თეა წულუკიანი საკანონმდებლო ორგანოს მოუწოდებს, იარაღის შეძენა-შენახვა-ტარების გამკაცრებასთან დაკავშირებით კანონში ცვლილების შეტანა დააჩქაროს. ამასთან დაკავშირებით წულუკიანმა განცხადება სპორტული შეჯიბრების მანიპულაციების წინააღმდეგ ბრძოლის საკითხებზე შექმნილი უწყებათაშორისი კომისიის სხდომის დასრულების შემდეგ გააკეთა.

წულუკიანი თქმით დანაშაულს ერთი ცალკეული ცვლილება და ერთი ცალკეული კანონი ვერ დაამარცხებს, რადგანაც სახელმწიფოს ის სპექტრი და მრავალფეროვანი მექანიზმები უნდა ჰქონდეს, რითაც დანაშაულს შეიძლება ებრძოლოს.

„ ყოველთვის ვიცავდი და დღესაც ვიცავ იმ პოზიციას, რომ ჩვენს ქვეყანაში იარაღის უკანონო შეძენა-შენახვა-ტარება და გამოყენება აკრძალულია, მაგრამ ასევე, კანონიერად შეძენის წესები უნდა გამკაცრდეს. ყველას არ უნდა ჰქონდეს იარაღზე ადვილად წვდომა. ეს ჩემი პოზიციაა, თუნდაც კანონიერად იარაღის შეძენა თავის მოწონებად არ უნდა ითვლებოდეს და ამას ყველა ერთად უნდა შევებრძოლოთ, მათ შორის, კანონის ძალით“, - განაცხადა თეა წულუკიანმა და პარლამენტს იარაღთან დაკავშირებით კანონის მიღების დაჩქარებისკენ მოუწოდა

„კიდევ ერთხელ მინდა მოვუწოდო პარლამენტს იმ კანონის მიღება დააჩქაროს, რომელიც იარაღზე კანონიერ წვდომას აძნელებს. ჩვენ ერთ დანაშაულთან ბრძოლის ერთ-ერთ რიგით, მაგრამ მნიშვნელოვან მექანიზმად უნდა ვაქციოთ“, - განმარტა იუსტიციის მინისტრმა.

იარაღის შეძენა-შენახვა-ტარების გამკაცრებასთან დაკავშირებული კანონპროექტის ინიციატორი იუსტიციის სამინისტროა. ის პარლამენტში უკვე რამდენიმე თვეა, გადაგზავნილია, თუმცა, მისი მიღება როგორც იუსტიციის მინისტრი აცხადებს, ჭიანურდება.