საზოგადოებრივი მოძრაობა “ივერია” სპეციალურ განცხადებას ავრცლებს და აცხადებს, რომ საქართველოში ინსტიტუცების ნგრევა მიმდინარეობს, რასაც "ივერიას" აზრით სავალალო შედეგები მოჰყვება. შერყეული სახელმწიფოებრიობის მაგალითად მათ რამდენიმე დღის წინ პოლიციელებზე განხორციელებული თავდასხმა მოჰყავთ. საზოგადოება "ივერიას" განცხადებას "ნიუპოსტი" უცვლელად გთავაზობთ:

"ბოლო ორი წლის განმავლობაში საქართველოში თვალნათლივ შეინიშნება ფუნდამენტური სახელმწიფო ინსტიტუტების ნგრევის უკიდურესად საშიში პროცესი.

ამის ერთ-ერთ მთავარ მიზეზს წარმოადგენს ქვეყანაში მმართველი გუნდის სახით არასახელმწიფოებრივი მენტალიტეტის მატარებელი ადამიანების მოსვლა ქვეყნის უმაღლეს თანამდებობებზე, რომელთათვის დამახასიათებელია არაკომპეტენტურობა, უპასუხისგებლობა და ნეპოტიზმი. ასეთი პირების მმართველ პოზიციებზე ყოფნამ გამოიწვია ანტისახელმწიფოებრივი და არაეთიკური ხედვების და მართვის სტილის სახელმწიფო უწყებების სიღრმეში ჩაღწევა.

ეს ტენდენცია უპირველესად შეეხო ქართულ პოლიციას, რომელიც სახელმწიფოსა და მოქალაქეს შორის ურთიერთობის პირველ და უმნიშვნელოვანეს რგოლს წარმოადგენს. მის სიმტკიცეზეა დამოკიდებული საზოგადოებრივი მართლწესრიგი და თითოეული მოქალაქის უსაფრთხოება.

ე.წ. “კრიმინალური ავტორიტეტებისთვის” მემორიალის დადგმა, სპეციალური დანიშნულების რაზმის წევრების მტკიცებულებათა გარეშე დაპატიმრება, პოლიციელის მკვლელობაში ეჭვმიტანილის ოფიციალური სტრუქტურის წარმომადგენელთა მიერ საზღვრის კანონსაწინააღმდეგო გადაკვეთის ხელშეწყობა, საზღვარგარეთიდან დეპორტირებული ე.წ “კანონიერი ქურდების” ქვეყნიდან გაპარება, მმართველ წრეებთან დაახლოებული “ხელშეუხებელი” პირების მანკიერი ფენომენის გაჩენა, სისხლის სამართლის (მათ შორის მძიმე) მუხლებით გასამართლებული პატიმრების უპასუხისმგებლო მასობრივი ამნისტირება და მათი დიდი ნაწილისთვის პოლიტპატიმრის სტატუსის მინიჭება წარმოადგენს არასრულ სიას შექმნილი სახიფათო და არაპროგნოზირებადი მდგომარეობისა, რაც არყევს სახელმწიფოს საფუძვლებს და სასიცოცხლო საფრთხეს უქმნის მის არსებობას.

სწორედ შერყეული სახელმწიფოებრიობის მაგალითია რამდენიმე დღის წინ უპასუხისგებლო ამნისტიით გათავისუფლებული პირის მხრიდან პოლიციელებზე შეიარაღებული თავდასხმა, რასაც ბექა მარგიშვილის სიცოცხლე შეეწირა.

საზოგადოებრივი მოძრაობა “ივერია” საქართველოს ხელისუფლებისაგან მკაცრად მოითხოვს, დაუყოვნებლივ შეწყვიტოს საკუთარი დესტრუქციული და ანტისახელმწიფოებრივი პრაქტიკა და ინსტიტუციების ნგრევისკენ მიმართული პოლიტიკა, რაც საფრთხეს უქმნის ჩვენი სამშობლოს მშვიდობიან, თავისუფალ და დემოკრატიულ არსებობას."- აღნიშნულია განცხადებაში.