თბილისის მერმა დავით ნარმანიამ გრობოედოვის 20-ში და ინგოროყვას 18-ში ავარიული სახლების მიმდინარე სარეაბილიტაციო სამუშაოები დაათვალიერა.

მიმდინარე სამუშაოებს ასევე გაეცნენ მერის მოადგილე გიორგი სოლომონია, კეთილმოწყობის საქალაქო სამსახურის უფროსი ავთანდილ სუდაძე, მთაწმინდის გამგებელი გელა არჩვაძე.

თბილისის მერის დავით ნარმანიას თქმით, ამ ეტაპზე 35-ზე მეტ ეზოსა და სახლში მიმდინარეობს როგორც კონსტრუქციული, ისე გამაგრებითი სამუშაოები 10 000 000 ლარამდე ჯამური ღირებულებით.

„ამინდების გამოსვლისთანავე სამუშაოების ტემპმა იმატა. შესრულებული სამუშაოების ხარისხს მუნიციპალური ლაბორატორია ყოველდღიურ რეჟიმში ამოწმებს, რათა კონტრაქტორმა კომპანიებმა ხარისხიანად შეასრულონ დაკვეთილი სამუშაო“ - განაცხადა დავით ნარმანიამ.

გრიბოედოვის 20-ში მდებარე საცხოვრებელი სახლის კაპიტალური გამაგრება 2014 წლის დეკემბერში დაიწყო და 2015 წლის მაისში დასრულდება. სამუშაოებისთვის დედაქალაქის ბიუჯეტიდან 600 000 ლარამდეა გამოყოფილი. პროექტის მიხედვით, რეაბილიტაციის ფარგლებში კაპიტალურად გამაგრდება საცხოვრებელი კორპუსი, საძირკველი, დაბზარეული კედლები და დაზიანებული ღობები, მოეწყობა შიდა ეზო. სამუშაოების დასრულების შემდეგ საცხოვრებელი სახლის ექსპლუატაციის ვადა მნიშვნელოვნად გახანგრძლივდება.

რაც შეეხება ინგოროყვას 18-ში მდებარე საცხოვრებელ სახლს, უკვე დამუშავდა საძირკვლის გრუნტი, ლითონის კონსტრუქციით მთლიანად გარემონტდება ეზოში შესასვლელი თაღისა და კარის ღობები, დაზიანებულ ავარიულ კედლებზე მოეწყობა არმატურის ბადე, გამოიცვლება კომუნიკაცია და სხვა. სარეაბილიტაციო სამუშაოებისთვის საერთო ჯამში 97 600 ლარი დაიხარჯება.