თბილისის ყოფილი მთავარი პროკურორი მაია მწარიაშვილი ლაშა ნაცვლიშვილისა და გია უდესიანის შესაძლო კავშირზე გავრცელებულ ინფორმაციას ეხმაურება.

მწარიაშვილის თქმით, თუ ნაცვლიშვილი უდესიანის წინააღმდეგ არსებულ საქმეს აჩერებდა, მისი პროკურატურიდან წამოსვლის შემდეგ რატომ არ მოხდა ამ საქმეებისთვის მსვლელობის მიცემა.

„თუ ვთქვათ ძველ შემადგენლობას ეს საქმე უნდა დაეწყო და დაესრულებინა ჯერ კიდევ ათი თვის განმავლობაში, წელიწადნახევარში რატომ არ უნდა დასრულებულიყო? თუ ნაცვლიშვილს ეს საქმე ედო სადღაც თაროზე, სადღაც თავის კაბინეტში, ნაცვლიშვილმა რომ დატოვა ეს კაბინეტი, ვიღაც ხომ შევიდა იმ ოთხაში და იმ თაროდან ხომ ჩამოიღო ეს საქმე? ხოდა რომ ჩამოიღო, წელიწადნახევარი სად იყო ეს საქმე?“ , - განაცხადა მაია მწარიაშვილმა.

გარდაცვლილი ბიზნესმენის ბესიკ ხარძიანის მეგობრის ირაკლი კორძაიას განცხადებით, ბესიკ ხარძიანისთვის წართმეული ბიზნესის დაბრუნებას „ოცნების“ ხელისუფლების ყოფილი მაღალჩინოსნებიც სპეციალურად აფერხებდნენ.

„უდესიანის გვარის გარდა ამ საქმეში მართალია ფარულად მაგრამ გამოჩნდა სხვა გვარებიც, ეს გვარებია ლაშა ნაცვლიშვილი, რომელიც ხელოვნურად აყოვნებდა ამ პროცესს, ეს არის ბატონი ჯანყარაშვილი რომელსაც აქვს პირდაპირი ბიზნესინტერესები უდესიანთან“, - აცხადებდა კორძაია.