„ნაციონალური მოძრაობა“ ინიციატივით გამოდის, რომ პოლიციელების სოციალური დაცვის გარანტია 100 ათასი ლარი გახდეს.

ამის შესახებ დღეს გამართულ ბრიფინგზე პარტიის წევრმა პავლე კუბლაშვილმა განაცხადა.

მისი თქმით, სამსახურებრივი მოვალეობის შესრულების დროს პოლიციელის გარდაცვალების შემთხვევაში მის ოჯახს ერთჯერადი დახმარების სახით 15 ათასი ლარი გადაეცემა, ხოლო თავისუფლებისა და დამოუკიდებლობისთვის ბრძოლებში სამხედრო მოსამსახურეების დაღუპვის შემთხვევაში ერთჯერადი დახმარება 100 ათას ლარს შეადგენს.

ოპოზიციაში მიიჩნევენ, რომ კანონში არსებული ეს ხარვეზი უნდა გამოსწორდეს და სამხედროების და პოლიციელების დაცვის განარტიები უნდა გათავანბრდეს.

„პოლიციელის სოციალური დაცვის გარანტია უნდა იყოს ზუსტად ისეთივე, როგორიც არის ტერიტორიული მთლიანობისთვის ბრძოლებსა და სამშვიდობო ოპერაციებში დაღუპულთა შემთხვევაში. ამიტომ გამოვდივართ ინიციატივით, გავათანაბროთ ეს სოციალური დაცვის გარანტია და 100 ათასი ლარი გავხადოთ. ეს ის საკითხია, რომელზეც ერთიანი პოზიცია უნდა იყოს. დღეს პოლიციას, ისე როგორც არასდროს, სჭირდება თანადგომა“, - აღნიშნა კუბლაშვილმა.