საქართველოში 14 აპრილს დანიის, პოლონეთის და შვედეთის საგარეო საქმეთა მინისტრები - მარტინ ლიდეგორდი, გჟეგოჟ სხეტინა და მარგოტ ვოლსტრომი ჩამოვლენ. ამის შესახებ, საგარეო საქმეთა სამინისტროს სპიკერმა - დავით კერესელიძემ, საგარეო საქმეთა სამინისტროში გამართულ პრესკონფერენციაზე განაცხადა. როგორც მან აღნიშნა, დანიის საგარეო საქმეთა მინისტრი უკვე მესამედ ესტუმრება ჩვენს ქვეყანას, ბოლო ერთი წლის განმავლობაში.

"ევროკავშირის წევრი ქვეყნების საგარეო საქმეთა მინისტრების ერთობლივი ვიზიტი საქართველოსადმი სოლიდარობის კიდევ ერთი თვალსაჩინო გამოხატულებაა. განსაკუთრებით მაისში დაგეგმილი რიგის სამიტის წინ", - განაცხადა კერესელიძემ.

კერესელიძის განცხადებით, სამი ქვეყნის საგარეო საქმეთა მინისტრი ქართველი კოლეგის გარდა, შეხვედრებს გამართავენ საქართველოს პრეზიდენტთან, პრემიერ-მინისტრთან და პარლამენტის თავმჯდომარესთან.

ამავე ვიზიტის ფარგლებში, თამარ ბერუჩაშვილი პოლონელ კოლეგასთან ერთად ხელს მოაწერს მემორანდუმს, რომელიც აფუძნებს თბილისის კონფერენციას – თანამშრომლობის სრულიად ახალ ფორმატს. აღნიშნული გულისხმობს საქართველოს ევროპული და ევროატლანტიკური მისწრაფებების განხორციელებაში პოლონეთის როლის ამაღლებას და გამოცდილების გაზიარებას.