„დემოკრატიული მოძრაობის“ ლიდერი ნინო ბურჯანაძე პოლიციელებზე თავდასხმის ფაქტს ეხმაურება და ამბობს, რომ ეჭვმიტანილის ასაყვანად სპეცოპერაცია არაპროფესიონალურად იყო ჩატარებული.

ამის შესახებ ბურჯანაძემ ტელეკომპანია „მაესტროს“ ეთერში განაცხადა.

მისი თქმით, ქვეყანაში კრიმინოგენული ვითარება გაუარესებულია და რაც არ უნდა ეცადოს ხელისუფლება, ამას ვერ დამალავს.

„მინდა ერთი რამ შევახსენო ხელისუფლებას, რომ „ნაციონალური მოძრაობის“ ხელისუფლებაში მოსვლის პირველი ორი წლის განმავლობაში ამდენი გაუხსნელი მკვლელობა არ იყო, მითუმეტეს ისეთი ცინიზმით განხორციელებული, როგორც ეს ვაზაგაშვილის, კიწმარიშვილის და ხარძიანის შემთხვევაში იყო. ვითარება დამძიმებულია. მე ვხედავ აბსოლუტურ არაპროფესიონალიზმს საგამოძიებო უწყებების მუშაობის კუთხით. ვარკეთილში ჩატარებული სპეცოპერაცია რომ ვნახე, მეგონა ან ომი დაიწყო, ან უკეთეს შემთხვევაში რაღაც ტერორისტული ბანდა შემოგვესია, რომელსაც შინაგან საქმეთა სამინისტრო და სპეცრაზმი უნდა გამკლავებოდა. ეს უბრალოდ სამარცხვინო იყო და ძალიან ვწუხვარ, რომ ამას ვამბობ სპეცრაზმის იმ ბიჭებზე, რომელთაც ხშირად მართლაც უწევთ საკუთარი თავის გაწირვა და საშიშ ოპერაციებზე წასვლა, მაგრამ ისინიც აბსოლუტურად დაუცველები იყვნენ“, - განაცხადა ბურჯანაძემ.