პოლიციელების მკვლელობაში ბრალდებულის შალვა აბულაძის და სალომე აბულაძე ამბობს, რომ ძმასთან ურთიერთობა 9 თვის წინ გაწყვიტა.

ამის შესახებ სალომე აბულაძემ „ნიუპოსტთან“ საუბარში განაცხადა.

„ბოლოს ჩემი ძმა 9 თვის უკან ვნახე. მაშინ ოჯახი ვკონტაქტობდით, მერე უკვე მოხდა რაღაც ფაქტები და ამის შემდეგ გავწყვიტეთ ურთიერთობა. რაც შეეხება კითხვას, არის თუ არა კავშირი ბორჯომში და ვარკეთილში მომხდარ მკვლელობას შორის, ამაზე ჩემი მხრიდან საუბარი არასწორია. სამართალდამცველებმა თქვეს, რომ კავშირი არისო, მათ უკეთ იციან და სავარაუდოდ არის“, - ამბობს ბრალდებულის და.

მისივე ინფორმაციით, შალვა აბულაძეს ფსიქოლოგიური პრობლემები ჰქონდა.

„რომ ვიმსჯელოთ ის, რაც მან ჩაიდინა ჯანმრთელი ადამიანის მოქმედებას არ ჰგავს. მას ორი ცოლი და სამი შვილი ჰყავდა, თუმცა არც მათთან ჰქონდა ურთიერთობა. არ ვიცი რა ვთქვა საერთოდ. კონკრეტულად პოლიციელების მიმართ აგრესია არ ჰქონია, პირიქით, ციხიდან რომ გამოვიდა, ხშირად წერდა განცხადებებს და რეაგირებდა ყველა უკანონობაზე. ციხიდან გამოვიდა აბსოლუტურად კანონმორჩილი და მოწესრიგებული ადამიანი, შემდეგ ისევ დაეწყო გადახრები, მას შემდეგ ურთიერთობა აღარ გვაქვს, არ ვიცი რა გითხრათ“, - ამბობს აბულაძე, თუმცა განმარტავს, რომ მის ძმას ბორჯომის პოლიციის უფროსთან გარკვეული უთანხმოება ჰქონდა.

რაც შეეხება შალვა აბულაძის და „ასავალ-დასავალის“ ჟურნალისტის დიტო ჩუბინიძის ურთიერთობას, სალომე აბულაძე ამბობს, რომ მის ძმას ჟურნალისტი მათთან არასდროს უხსენებია.

შეგახსენებთ, ვარკეთილის მეტროსთან 4 აპრილს ორი პოლიციელი დაჭრეს. მათგან ერთ-ერთი ბექა მარგიშვილი საავადმყოფოში ოპერაციის დროს გარდაიცვალა. მეორე სამართალდამცველის მდგომარეობა ამ დრომდე სტაბილურად მძიმეა.

ნინო დათაშვილი