ნუ უწოდებთ პოლიციას ,,დაჩმორებულს“ - გომელაურის მიმართვა პოლიტიკოსებს და საზოგადოებას

პოლიტიკა - 17:00, 05 Apr, 2015

1142

საქართველოს არ ჰყავს „დაჩმორებული“ პოლიცია - ამ განცხადებით მიმართა შს მნისტრმა ვახტანგ გომელაურმა პოლიტიკოსებს და საზოგადოების სხვადასხვა ფენის წარმომადგენლებს და მოუწოდა, რომ მსგავსი შეფასებისგან თავი შეიკავონ. ამის შესახებ გომელაურმა ვარკეთილში პოლიციელის მკვლელობასთან დაკავშირებულ საგამოძიებო მოქმედებებზე საუბრისას ჟურნალისტებს განუცხადა.
"ძალიან მინდა, ყველას მოვუწოდო, მნიშვნელობა არ აქვს, რომელიმე პარტიის წარმომადგენელი იქნება, ინსტიტუტციების თუ ორგანიზაციების. ძალიან სამწუხაროა, როდესაც გამოდიან და იძახიან, რომ პოლიცია არის დემორალიზებული, რომ პოლიცია არის, ბრჭყალებში ვიტყოდი და ბოდიშს მოვუხდიდი ჩემს კოლეგებს, "დაჩმორებული". დაჩმორებული პოლიცია ამას ვერ გააკეთებდა, არ გამოეკიდებოდა არც მკვლელს, არც რეციდივისტს და არც კრიმინალს. პოლიცია არის მოწოდების სიმაღლეზე და არ შეიძლება ამ ადამიანებს, რომლებიც დღე და ღამე იცავენ, როგორც ჩემ შვილებს, და ყველას შვილებს, ამ პოლიციელებს გვერდში დგომა უნდა და არა ყოველი ეთერიდან იქნება თუ ბეჭდური პრესიდან, იმის ძახილი, რომ დემორალიზებული და "დაჩმორებულია"- განაცხადა მინისტრმა. გუშინ ღამით, ვარკეთილში უცნობმა პირმა 2 პოლიციელს ცეცხლი გაუხსნა, რის შედეგადაც პოლიციის ერთი თანამშრომელი გარდაიცვალა, ხოლო მეორე დაიჭრა. დამნაშავე ადგილიდან მიიმალა.