,,ოკუპირებული ტერიტორიების შესახებ“ კანონის გამარტივებაში საგანგაშო არაფერია“

,,ოკუპირებული ტერიტორიების შესახებ“ კანონის გამარტივებაში საგანგაშო არაფერია“ - ზაქარეიშვილი

პოლიტიკა - 19:21, 04 Apr, 2015

1667

„ოკუპირებული ტერიტორიების შესახებ კანონში“ შესატანი ცვლილებებთან დაკვაშირებით, როგორც „ნიუსპოსტის“ კითხვაზე შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა განაცხადა, თუ კანონის გამარტივებას სოხუმი ეთანხმება, გამოდის, რომ მათთვის „ოკუპირებული ტერიტორიების შესახებ კანონის“ არსებობს და ანგარიშგასაწევია.

„ბატონი გაგულიას კომენტარი ძალიან საინტერესოა. ის ადასტურებს იმას, რომ მათთვის ეს კანონი არსებობს და ანგარიშგასაწევი დოკუმენტია და მიესალმებოდნენ მის შეცვლას. მე ამაში საგანგაშოს ვერ ვხედავ, რომ სოხუმში მცხოვრები ჩვენი მოქალაქე ცვლილებას ითხოვდეს“, - აცხადებს ზაქარეიშვილი.

რაც შეეხება „ოკუპირებული ტერიტორიების შესახებ კანონში“ ცვლილებას, ზაქარეიშვილი კიდევ ერთხელ განმარტავს, რომ ამას ევროკავშირთან გაფორმებული ასოცირების ხელშეკრულება ითვალისწინებს.

„ასოცირების ხელშეკრულებაში წერია, რომ საქართველო „ოკუპირებული ტერიტიროების შესახებ“ კანონში ცვლილებებს შეიტანს. ძირითადი ცვლილება არის ის, რომ კანონის ამჟამინდელი ვერსიით, უცხო ქვეყნის მოქალაქე, რომელიც ოკუპირებულ ტერიტორიაზე გადაადგილდება, ისჯება სისხლის სამართლის სასჯელით. ჩვენი ამოცანაა, რომ სისხლის სამართლის დანაშაულზე სასჯელი შევცვალოს ადმინისტრაციული სასჯელით. ადამიანის ბრალი არაა, რომ ტერიტორია ოკუპირებულია. ამ ადამიანს კანონის დარღვევის მოტივაცია არ აქვს. მიმაჩნია, რომ ამ შემთხვევაში, ვგულისხმობ კანონში შესატან ცვლილებებს, თუ აფხაზეთში მცხოვრები პირის და ჩემი მხრიდან გაჟღერებული პოზიცია ერთმანეთს ემთხვევა, მე ამას მივესალმები. აქვე ავღნიშნავ, კანონის არსებობა აუცილებელია. ამით ჩვენ საერთაშორისო საზოგადოებას ვაცნობთ, რომ რუსეთის ჯარები ჩვენს ტერიტორიაზე უკანონოდ იმყოფება. კანონი უნდა იყოს, მაგრამ პოზიციები უნდა შეიცვალოს, რომ ადამიანები მინიმალურად დაზარალდნენ“, - განაცხადა ზაქარეიშვილმა.

შეგახსენებთ, რომ აფხაზეთის დეფაქტო რესპუბლიკის ე.წ. საგარეო საქმეთა მინისტრის ოფიციალურმა წარმომადგენლმა, არტურ გაგულიამ, საქართველოს „ოკუპირებული ტერიტორიების შესახებ“ კანონის გამარტივებისაკენ მოუწოდა. გაგულიას თქმით, კანონი, თავად საქართველოს აყენებს ზიანს, რადგან დაბრკოლებას უქმნის რუსულ-ქართულ დიალოგსა და „აფხაზეთსა და სამხრეთ ოსეთთან არსებულ რთულ ურთიერთობას, კიდევ უფრო ართულებს.“

„როგორც ჩანას, ევროპაში ესმით, საქართველოს კანონის სამართლებრივი შეუსაბამობა და მისი უარყოფითი გავლენა რეგიონის ჰუმანიტარულ სიტუაციაზე. რაც იმას ნიშნავს, ასეთი საჩივრები მომავალში უფრო ხშირად გაჟღერდება“ - განაცხადა გაგულია.