საპარლამენტო უმრავლესობის ლიდერი დავით საგანელიძე საპარლამენტო კომისიის შექმნასთან დაკავშირებით „თავისუფალი დემოკრატების“ მოთხოვნას ეხმაურება და ამბობს, რომ ინიციატივის წინააღმდეგია.

მისი თქმით, კომისიის შექმნის შემთხვევაში დროებითი კომისიების გაუთავებელ და უსასრულო კასკადს მიიღებს.

„არა მგონია, რომ ყველა საკითხზე რასაც ოპოზიცია წამოჭრის, პარლამენტმა საგამოძიებო კომისიები უნდა შექმნას. ამ შემთხვევაში მივიღებთ კომისიების უსასრულო და გაუთავებელ კასკადს რაც წარმოუდგენელია. რაზეც "თავისუფალი დემოკრატები" საუბრობენ ეს საკითხი არ არის ის, რომელზეც ახლა კომისია უნდა შეიქმნას. თუ სასაუბრო და სალაპარაკო იყო ეს თემა, კომისია თავის დროზე უნდა შექმნილიყო. ჩემი აზრით, ასეთი კომისია არ უნდა შეიქმნას, ამის მომხრე არ ვარ“, - განაცხადა საგანელიძე და აღნიშნა, რომ ამ თემაზე უმრავლესობას არ უსაუბრია.

თავდაცვის ყოფილი მინისტრის ირაკლი ალასანიას განცხადებით „თავისუფალი დემოკრატები“ პარლამენტში შევლენ მოთხოვნით, რომ შეიქმნას დროებითი კომისია, რომელიც შეისწავლის თუ რა პირობებში და როგორ დაიდო მემორანდუმი საფრანგეთთან და რა დააკლდა ქვეყანას ამ მემორანდუმის პირობების არშესრულებით.