,,დიპლომატიური ხრიკი“ - ,,ოკუპირებული ტერიტორიების შესახებ“ კანონის გამარტივება თუ გაუქმება?

,,დიპლომატიური ხრიკი“ - ,,ოკუპირებული ტერიტორიების შესახებ“ კანონის გამარტივება თუ გაუქმება? - ქარდავა

პოლიტიკა - 16:03, 04 Apr, 2015

1188

„ეროვნულ-დემოკრატიული პარტიის“ ლიდერი ბაჩუკი ქარდავა სოხუმის მიერ „ოკუპირებული ტერიტორიების შესახებ“ კანონის გამარტივების მოთხოვნას ეხმაურება და არ გამორიცხავს, რომ ეს „დიპლომატიური ხრიკი“ იყოს.

ამის შესახებ ქარდავამ „ნიუპოსტთან“ საუბარში განაცხადა.

„რამდენადაც ვიცი, სოხუმი არ ცნობს აფხაზეთს ოკუპირებულ ტერიტორიად. ამ შემთხვევაში, ის რუსეთს არ თვლის ოკუპანტად. ამდენად საკითხის დაყენება ისე, რომ სოხუმი გამარტივებას ითხოვს, ეჭვი მეპარება. შესაძლოა სოხუმი არა გამარტივებას, არამედ ამ კანონის გაუქმებას ითხოვდეს. სოხუმი თუ მოითხოვს გამარტივებას, მაშინ ის აღიარებს, რომ ეს ტერიტორია ოკუპირებულია რუსეთის მიერ. შეიძლება ეს დიპლომატიური ხრიკია. თუმცა თუ საუბარია გამარტივებაზე, აქ აფხაზეთის რუსული მთავრობის პოზიცია კი არ არის მნიშვნელოვანი, ამ შემთხვევაში მნიშვნელოვანია დღევანდელი ჩვენი ხელისუფლების პოზიცია. თუმცა მე არ ვამბობ, რომ ჩვენმა ხელისუფლებამ ამ მოთხოვნას უნდა უპასუხოს, რადგან ჩვენ კონფლიქტი გვაქვს არა აფხაზეთთან, არამედ რუსეთთან. ამდენად ეს თემა პრინციპული იმდენად არის, რამდენად პრინციპული იქნება ჩვენი საგარეო საქმეთა სამინისტროს განცხადება“, - ამბობს ქარდავა.

ედპ-ს ლიდერი იმედოვნებს, რომ ამ საკითხთან მიმარებაში საგარეო უწყება რადიკალური იქნება.

„საგარეო პოლიტიკაში არ არის ხშირად ადეკვატური დღევანდელი მთავრობა, მაგრამ იმედია ამ საკითხში იქნება ბევრად უფრო ადეკვატური და პრინციპული, ვიდრე სხვა საკითხებთან მიმართებაში იყო. ამ შემთხვევაში საგარეო უწყების ნაბიჯი უნდა იყოს პრინციპული კრემლთან მიმართებაში და ენის მოჩლექით არ უნდა ისაბროს იმ პრობლემაზე, რაც მოსკოვსა და თბილისს შორისაა. მოსკოვი ამ შემთხვევაში ოკუპანტია და საქართველო იძულებულია იმ ტერიტორიაზე, რომელსაც ის ვერ აკონტროლებს, გამოაცხადოს ოფიციალურად, რომ მას არ აქვს გავლენა და ამ შემთხვევაში მსოფლიომ შესაბამისი ნაბიჯები უნდა გადადგას და შესაბამისი დამოკიდებულება უნდა ჰქონდეს იმ ტერიტორიებთან, რომელიც არის ქართული, მაგრამ არის ოკუპირებული. ეს მოთხოვნა უნდა დავაყენოთ საერთაშორისო თანამეგობრობის წინაშე“, - განაცხადა ქარდავამ.

აფხაზეთის დეფაქტო რესპუბლიკის ე.წ. საგარეო საქმეთა მინისტრის ოფიციალურმა წარმომადგენლმა არტურ გაგულია, ევროკავშრის მიერ საქართველოსთვის „ოკუპირებული ტერიტორიების შესახებ“ კანონის გამარტივების მოწოდების შესახებ კომენტარი დღეს გააკეთა.