საქართველოს პარლამენტის სპორტისა და ახალგაზრდულ საქმეთა კომიტეტი სპორტული ფედერაციების წარმომადგენლებს საპასუხო წერილს უგზავნის.

როგორც წერილშია აღნიშნული, კომიტეტი მზადყოფნას გამოთქვამს ფედერაციების წარმომადგენლები მიიწვიოს პარლამენტში და სრული ინფორმაცია მიაწოდოს საკომიტეტო სხდომის შესახებ.

"საქართველოს პარლამენტის სპორტისა და ახალგაზრდულ საქმეთა კომიტეტი ყურადღებით გაეცნო თქვენ მიერ ხელმოწერილ ერთობლივ განცხადებას, სადაც გამოთქმულია შეშფოთება, ქართულ სპორტში მიმდინარე პროცესების თაობაზე და გამოთქმულია სურვილი, სპორტისა და ახალგაზრობის საქმეთა სამინისტროს და ახალგაზრდულ საქმეთა კომიტეტისა და სპორტული ფედერაციების წარმომადგენელთა ერთობლივი შეხვედრის თაობაზე. მინდა გაცნობოთ, რომ ჩვენი საპარლამენტო კომიტეტი მოქმედებდა და მოქმედებს საქართველოს კანონდებლობით გათვალისწინებული უფლებამოსილებისა და პარლამენტის რეგლამენტის ფარგლებში. შესაბამისად გადაწყვეტილებას ღებულობს დადგენილი პროცედურების შესაბამისად. ასე წარიმართა 2015 წლის 25 მარტს გამართული საკომიტეტო მოსმენაც, სადაც კომიტეტის წევრებმა გამოხატეს თავიანთი პოზიცია საქართველოს სპორტისა და ახალგაზრდობის საქმეთა სამიინსტროს საქმიანობის შესახებ, ეს პროცესი არ გულისხმობდა სპორტული ფედერაციების მონაწილეობას. თუმცა ჩვენი კომიტეტი გამოთქვამს მზადყოფნას, თქვენი დაინტერესების შემთხვევაში, მოგიწვიოთ საქართველოს პარლამენტში და სრული ინფორმაცია მოგაწოდოთ საკომიტეტო სხდომის შესახებ, ასევე განვიხილოთ ჩვენი სპორტის აქტუალური საკითხები", - აღნიშნულია წერილში.

შეგახსენებთ, დღეს სასტუმრო „რედისონში“ სპორტული ფედერაციები შეიკრიბებიან და სპორტის კომიტეტის და სამინისტროს წარმომადგენელთა მოსაზრებებს მოისმენენ.