"თავისუფალი დემოკრატები" საფრანგეთის ელჩის განცხადებას ეხმაურებიან

პოლიტიკა - 21:26, 03 Apr, 2015

1864

საფრანგეთის ელჩის რენო სალენსის მიერ გაკეთებულ განცხადებას იმასთან დაკავშირებით, რომ ქართულ მხარეს საჰაერო თავდაცვით შეიარაღებასთან დაკავშირებით არანაირ შეთანხმებაზე, ხელშეკრულებასა თუ ვალდებულებაზე ხელი არ მოუწერია, ალასანიას გუნდი გამოეხმაურა

როგორც „თავისუფალი დემოკრატები“ ერთ-ერთმა ლიდერმა ირაკლი ჩიქოვანმა „ნიუპოსტთან“ საუბარში განაცხადა, მისი ინფორმაციით რენო სალენსი ხელშეკრულებაზე ხელმოწერის პროცესს არ ესწრებოდა, ამასთანავე ელჩის განცხადებაში არ გამორიცხულა კითხვა იმასთან დაკავშირებით, არსებობდა თუ არა მემორანდუმი, რომელსაც ხელი მოეწერა 2014 წლის ოქტომბერში და თვითონ ამ მემორანდუმის ვადები გავიდა თუ არა მარტში:

„თემის დელიკატურობიდან გამომდინარე საფრანგეთის დიპლომატიური სამსახურის წარმომადგენელი ძალიან თავშეკავებულ განცხადებას აკეთებს, მე რამდენადაც ვიცი ბატონი ელჩი თავად არ იმყოფებოდა ამ ხელშეკრულების ხელმოწერაზე და არც საგარეო საქმეთა სამინისტროს წარმომადგენელი, თუმცა ამ თემასთან მიმართებაში ის საქმის კურსში იყო.

ამასთანავე არსებობს ერთი კითხვა, რომელიც არის სავსებით ლოგიკური, რომელიც თვითონ ელჩის განცხადებაშივე არანაირი ფორმით და არცერთი სახით არ გამორიცხულა, ეს არის კითხვა არსებობდა თუ არა მემორანდუმი რომელსაც ხელი მოეწერა 2014 წლის ოქტომბერში და თვითონ ამ მემორანდუმის ვადები გავიდა თუ არა მარტში.“- აღნიშნა ჩიქოვანმა და კიდევ ერთხელ გააჟღერა „თავისუფალი დემოკრატების“ მოთხოვნა საპარლამენტო კომისიის შექმნასთან დაკავშირებით:

„მიუხედავად ყველაფრისა, რადგანაც არსებობს ამდენი შეკითხვები საზოგადოებაში და საზოგადოებას აინტერესებს ეს ყველაფერი, ზუსტად ამიტომ ვფიქრობთ, რომ სწორი და ადეკვატური ფორმა ამ შეკითხვებზე პასუხის გაცემის არის შესაბამისი საპარლამენტო ზედამხედველობის განხორციელება და კომისიის შექმნა , რომელიც შეისწავლის ამ საკითხებს და ნათელს მოჰფენს ამ ყველაფერს“- განაცხადა ირაკლი ჩიქოვანმა.