ქართულ მხარეს თავდაცვით შეიარაღებაზე შეთანხმებისთვის ხელი არ მოუწერია- საფრანგეთის ელჩი

პოლიტიკა - 19:50, 03 Apr, 2015

2069

საქართველოს თავდაცვის მინისტრი მინდია ჯანელიძე საქართველოში საფრანგეთის ელჩს რენო სალენს შეხვდა. თავდაცვის უწყების ინფორმაციით შეხვედრის შემდეგ ელჩმა კომენტარი იმ დოკუმენტის შესახებაც გააკეთა, რომელთან დაკავშირებითაც ყოფილი თავდაცვის მინისტრი საუბრობდა და რომლის განხორციელებაც ირაკლი ალასანიას განცხადებით პრემიერ მინისტრის და ბიძინა ივანიშვილის ჩარევის გამო ვერ მოხერხდა

თავდაცვის სამინისტროს პრესსამსახურის მიერ გავრცელებული ინფორმაციის თანახმად, საფრანგეთის ელჩმა, რენო სალენსმა განაცხადა, რომ ქართულ მხარეს საჰაერო თავდაცვით შეიარაღებასთან დაკავშირებით არანაირ შეთანხმებაზე, ხელშეკრულებასა თუ ვალდებულებაზე ხელი არ მოუწერია

ელჩის განცხადებით, საუბარია მხოლოდ განხილვებზე, რომელიც საქართველოს მთავრობასა და ფრანგ მწარმოებლებს შორის გასულ წელს დაიწყო.

"გასულ წელს დაიწყო გარკვეული განხილვები საქართველოს მთავრობასა და ფრანგ მწარმოებლებს შორის, ორმხრივი თანამშრომლობის ჩვეულ რეჟიმში. მე კიდევ ერთხელ ვამახვილებ ყურადღებას ტერმინზე „განხილვები“, რადგან ქართული მხრიდან არანაირ ვალდებულებაზე ხელი მოწერილი არ ყოფილა - არანაირი შეთანხმება, არანაირი ხელშეკრულება, არანაირი ვალდებულება და არაფერი მსგავსი. ერთადერთი რისი თქმაც ახლა შემიძლია არის ის, რომ ის განხილვები, რომლებიც გასულ წელს დაიწყო, გრძელდება,"– თავდაცვის სამინისტროს ცნობით, განაცხადა რენო სალენსმა.

თავდაცვის სამინისტროს ინფორმაციით, მხარეებმა დღის წესრიგში არსებული, მიმდინარე საკითხები და ორ ქვეყანას შორის თავდაცვის სფეროში სამომავლო თანამშრომლობის გეგმები განიხილეს. მინდია ჯანელიძემ ორმხრივი და მრავალმხრივი ურთიერთობის ფორმატში, საფრანგეთის რესპუბლიკასთან თანამშრომლობის გაღრმავებაზე გაამახვილა ყურადღება. ფრანგ დიპლომატთან საუბრის ერთ-ერთი თემა, საქართველოსთვის მინიჭებული არსებითი პაკეტის იმპლემენტაციისა და საქართველოს ევროატლანტიკურ სტრუქტურებში ინტეგრაციის პროცესი იყო.

შეგახსენებთ, დღეს საქართველოს თავდაცვის ყოფილმა მინისტრმა, ირაკლი ალასანიამ სპეციალური ბრიფინგი გამართა, სადაც განაცხადა, რომ 2014 წლის 28 ოქტომბერს საფრანგეთში საჰაერო თავდაცვით შეიარაღებასთან დაკავშირებით მემორანდუმს ხელი მოაწერა.

_{ნინო ზედგენიძე}