სამხრეთ ოსეთის დეფაქტო ხელისუფლების საგარეო საქმეთა სამინისტრო, საქართველოს პრეზიდენტის, გიორგი მარგველაშვილის განცხადებას ეხმაურება, რომელიც მან პარლამენტში სიტყვით გამოსვლისას გააკეთა და სადაც, საქართველოს კონფლიქტურ რეგიონებსა და მათი დეოკუპაციის აუცილებლობაზე ისაუბრა.

„მსგავსი განცხადებების მთავარი ადრესატი ყოველთვის დასავლური აუდიტორია იყო. რათა დასავლეთის სამყარო დაარწმუნონ, რომ საქართველო რეგიონში დემოკრატიის შუქურაა, რომელსაც მასშტაბური მხარდაჭერა სჭირდება“- აცხადებენ ე.წ. სამინისტროში.

განცხადებაში ნათქვამია, რომ „სამხრეთ ოსეთი არასოდეს დაივიწყებს და არ აპატიებს ქართულ მხარეს, 2008 წელს სამხრეთ ოსეთში განხორციელებულ გენოციდს, ეთნიკურ წმენდასა და ცხინვალის დაბომბვას.“

დეფაქტო ხელისუფლებაში აცხადებენ, რომ საქართველოს მიერ სამხრეთ ოსეთში განხორციელებული დანაშაულებრივი ქმედების გამო, პასუხი არავის უგია. უფრო მეტიც, “თბილისი კატეგორიულ უარს ამბობს, ხელი მოაწეროს ცხინვალისა და აფხაზეთის წინააღმდეგ ძალის გამოუყენებლობის შესახებ დოკუმენტს და რევამშისტული ამბიციების განსახორციელებლად საკუთარი სამხედრო პოტენციალის გაზრდას განაგრძობს, რათა ხელსაყრელი მომენტის შემთხვევაში ოსეთის ტერიტორია დაიკავოს.“

სამხრეთ ოსეთის დეფაქტო რესპუბლიკის ე.წ საგარეო საქმეთა სამინისტრო მიიჩნევს, რომ ტერიტორიული მთლიანობის აღდგენის პრეტენზიები თბილისს, ქვეყნის განვითარებასა და კეთილმეზობლური ურთიერთობის დამყარებაში უშლის ხელს. ამავდროულად, „ის სარიტუალო შელოცვები, რომლებიც თბილისის ტრიბუნებიდან ისმის, მხოლოდ იმ ხალხზე მოახდენს შთაბეჭდილებას, ვინც სამხრეთ კავკასიასა და რეგიონის პრობლემებს არ იცნობს.“

შეგახსენებთ, პრეზიდენტმა მარგველაშვილმა 31 მარტს პარლამენტში სიტყვით გამოსვლისას ქვეყნის ტერიტორიული მთლიანობის აღდგენასა და აფხაზეთისა და ცხინვალის დეოკუპაციის აუცილებლობაზე ისაუბრა. მისივე თქმით, ერთიანი საქართველოს სივრცეში , აფხაზებისა და ოსების თვითმყოფადობის, მათი პოლიტიკური და კულტურული უფლებების რეალიზების შენარჩუნება უნდა მოხდეს.

ხატია ლაღიძე