,,პრემიერის პირდაპირ გვემუქრება“ - საყდრისის გადარჩენის კომიტეტი დიპკორპუსს მიმართავს

პოლიტიკა - 18:41, 03 Apr, 2015

2112

პრემიერ-მინისტრის განცხადებას საყდრისის საბადოს და კომპანია „RMG“-ისთან დაკავშირებით, საყდრისის გადარჩენის საზოგადოებრივი კომიტეტის წევრები გამოეხმაურნენ. საყდრისის დამცველები პრემიერის მხრიდან მათი საქმიანობის დივერსიად შეფასებას მუქარის შემცველ გზავნილად მიიჩნევენ.

საყდრისის გადარჩენის საზოგადოებრივი კომიტეტის წევრი ირაკლი მამალაძე პრემიერის ამ განცხადებით დაინტერესებას არასამთავრობოებსა და დიპლომატიურ კორპუსს სთხოვს:

„პრემიერის ეს განცხადება არის პირდაპირი მუქარა, აქედან გამომდინარე მოვუწოდებ არასამთავრობო ორგანიზაციებს, დიპლომატიურ კორპუსს ყურად იღონ პრემიერის ეს პირდაპირი მუქარა, ის ითხოვს დასაჯონ სამოქალაქო საზოგადოების წარმომადგენელი- საყდრისის კომიტეტი. ჩვენ ვართ სამოქალაქო საზოგადოება და გავაგრძელებთ ამ ბრძოლას კულტურული მემკვიდრეობისთვის“- განაცხადა ირაკლი მამალაძემ.

კომიტეტის წევრი ნინო ბურჭულაძი თქმით მათ „RMG“-ის კომბინატის მუშაობის შეჩერება არასოდეს არ მოუთხოვიათ, არამედ ვანდალიზმის აღკვეთას ითხოვდნენ:

„გამოიძიონ სამართალდამცავებმა ჩვენი "დივერსიული" საქმეები, თუმცა პარალელურად გამოიძიონ საყდრისის აფეთქების კანონიერების საკითხიც, საყდრისის დაცვის კომიტეტს არასოდეს გაუკეთებია განცხადება კომბინატის მუშაობის შეჩერების თაობაზე, ჩვენ ვითხოვთ საგამოძიებო კომიტეტის შექმნას პარლამენტში, რათა თავიდან იქნეს აცილებული შემდგომში მსგავსი ვანდალური ფაქტები. გარდა ამისა ვითხოვთ არქეოლოგების დაშვებას ძეგლის იმ შეუსწავლელ ნაწილში, რომელიც ჯერ კიდევ ხელუხლებელია. აქედან გამომდინარე თუ ეს ითვლება ჩვენ დივერსიულ საქმიანობად, მაშინ, დიახ, მე ვარ დივერსანტი“- განაცხადა ბურჭულაძემ.

_{ნინო ზედგენიძე}