"საკრებულომ თვითკასტრაცია ჩაიტარა... რას აპირებს მარგიშვილი? "- დაპირისპირება საკრებულოს სხდომაზე

პოლიტიკა - 15:43, 03 Apr, 2015

1297

თბილისის საკრებულოში გაერთიანებული კომიტეტების სხდომაზე დღეს ბიუჯეტში შესატანი ცვლილებების განხილვამ დეპუტატებს შორის დაპირისპირება გამოიწვია. საკრებულოს უმცირესობა ბიუჯეტის პროექტში დაგეგმილი ცვლილებებით უკმაყოფილოა. ასევე ისინი პრეტენზიას გამოთქვამენ მე-20 მუხლის ამოღებასთან დაკავშირებით, რის შედეგადაც თბილისის მერიას აღარ ექნება ვალდებულება გარკვეულ პროექტებთან დაკავშირებით ნებართვის მისაღებად საკრებულოს კომისიების წინაშე წარსდგეს. ბიუჯეტში დაგეგმილ ცვლილებებთან დაკავშირებით შენიშვნები აქვს საკრებულოს დამოუკიდებელ დეპუტატ ალეკო ელისაშვილსაც.

სევდია უგრეხელიძემ უმრავლესობის პრეტენზიების საპასუხოდ, რომ საკრებულოს მხრიდან მერიის კონტროლის ეს მექანიზმი მის გამო შემოიღეს, განაცხადა, რომ თუ ის რამეში დამნაშავე იყო პროკურატურა მას აქამდეც დაიჭერდა.

„დღეს ის ფუნქცია მოგვაშორეს, რითაც თქვენ ამაყობდით, მე ვიყავი საქმეში არა? ჩემთვის შემოიღეს? დიდი მადლობა. პროკურატურაშია ყველა საქმე და თუ დასაჭერია დამიჭერდნენ აქამდე ალბათ“- განაცხადა უგრეხელიძემ და აღნიშნა რომ ამ ცვლილებით, საკრებულომ თვითკასტრაცია ჩაიტარა.

დედაქალაქის 2015 წლის ბიუჯეტის ცვლილებები გაუგებარია ალეკო ელისაშვილისთვის „ეს არის ცუდ ხასიათზე რომ ადამიანი გაიღვიძებს და აქეთ ზოგს მოაკლებს, ზოგს დაამატებს. ლოგიკა ამ ცვლილების არის ჩემთვის აბსოლუტურად გაუგებარი, მაგალითად ცე ჰეპატიტის პროგრამას რატომ აკლდება, გამწვანების ბიუჯეტი რატომ მცირდება“- მიმართა კითხვით ელისაშვილმა საკრებულოს დეპუტატებს და დეპუტატებს მოუწოდა ვინმემ ახსნას, რა ფუნქცია აკისრია ალექსანდრე მარგიშვილის ახალ უწყებას და რატომ უნდა დაუმტკიცოს საკრებულომ მის უწყებას 1,8 მილიონი. „ეს მარგიშვილის დაწესებულება რა არის იქნებ ვინმემ აგვიხსნას, ვიცით, რომ მარგიშვილი იქნება ამ გაუგებარი ორგანიზაციის ხელმძღვანელი და 1,8 მილიონი უნდა დავუმტკიცოთ, რისთვის? რას აპირებს ეს კაცი?“- განაცხადა საკრებულოს დამოუკიდებელმა დეპუტატმა.