საკრებულოს უმრავლესობაში სოციალური და ჯანდაცვის მიმართულების დაფინანსებასთან დაკავშირებით ფრაქცია „ნაციონალური მოძრაობის“ განცხადებას ეხმაურებიან.

ფრაქცია „ქართული ოცნება - მრეწველების“ წევრის გიორგი ტყემალაძის ინფორმაციით, სოციალურ პროგრამებში ცვლილებები ნამდვილად განხორციელდა.

„სოციალურ პროგრამებში ცვლილება მართლაც არის, დაახლოებით სამი მილიონით, თუმცა აქ საუბარია პროგრამაზე, რომლის გადაფრავა ხდება ჯანდაცვის სამინისტროს მხრიდან დაფინანსებაზე. რაც შეეხება ბიუჯეტს, 38 მილიონით იზრდება ბიუჯეტი ოლიმპიური ფესტივალის ინფრასტრუქტურის მშენებლობისათვის. პატარა პერიოდის განმავლობაში ხდება დიდი სამუშაოების ჩატარება და ვფიქრობთ, ზაფხულამდე ყველაფერი კანონიერად იქნება ჩატარებული“, - განაცხადა ტყემალაძემ.

საკრებულოს ფრაქცია „ნაციონალური მოძრაობის“ თავმჯდომარის ირაკლი აბესაძის ინფორმაციით, დედაქალაქის ბიუჯეტში ჯანდაცვისა და სოციალური მიმართულებით პროგრამები 7 მილიონი ლარით მცირდება.

მისივე ინფორმაციით, 4 მილიონი ლარით კი ამხანაგობების პროგრამები მცირდება.