„რა კავშირშია პარლამენტში საგამოძიებო კომისიის შექმნა, კომპანიის მუშაობასთან? ეს ხალხი სიცრუეშია შეყვანილი“, - ასე ეხმაურება „ნაციონალური მოძრაობის“ წევრი სერგო რატიანი კომპანია „RMG“-ის წარმომადგენლების მიერ გამოთქმულ პროტესტს იმ დეპუტატების მიმართ, ვინც საყდრისთან დაკავშირებით საგამოძიებო კომისიის შექმნას ითხოვენ.

როგორც რატიანმა „ნიუპოსტთან“ საუბარში განაცხადა, კომისიის ფუნქციაა შეისწავლოს, თუ რა დანაშაული იქნა ჩადენილი საყდრისში მომხდარი აფეთქები დროს.

„რა კავშირიშია საგამოძიებო კომისიის შექმნა, კომპანიის საქმიანობასთან? კომისიამ უნდა შეისწავლოს გარკვეული საკითხები, თუ რა დანაშაული იქნა ჩადენილი, მაშინ როდესაც მოხდა აფეთქება და ვინ არის ამაში დამნაშავე. ეს ადამიანები არიან ბიძინა ივანიშვილის პირადი მძევლები. სწორედ ივანიშვილი იყენებს ამ ადამიანებს, ისევე როგორც სხვებს... ის პოლიტიკურ პროცესებს ქუჩის აქციებით და ოპონენტებზე თავდასხმებით მართავს. ამიტომ ვამბობ, მთავრობა უნდა წავიდეს, რადგან არ შეუძლიათ იმუშაონ ისე, როგორც მუშაობს ნორმალური მთავრობა“, - აცხადებს რატიანი.

დეპუტატის განმარტებით, მსოფლიოს წამყვანი უნივერსიტეტების სამეცნიერო წრეები ამბობენ, რომ საყდრისი უძველები ძეგლია და მის აფეთქებას ვანდალურ ფაქტად აფასებე.

„გუშინ გამოვაქვეყნე გერმანული ინსტიტუტის ხელმძღვანელის წერილი სადაც ის ამბობს, რომ ესეთი ვანდალური აქტი შეგვიძლია შევადაროთ ISIS მიერ აფეთქებულ ძეგლებს. ამაზე დიდი სირცხვილი სახელმწიფოს არც ჰქონია. რაც შეეხება იმას, რომ გერმანელი მეცნიერები გრანტებს ჭამენ, ეს სასაცილოა. ის, რომ ჩვენ წამყვანი ქვეყნების უნივერსიტეტების ფონდები გვეხმარებიან ქართული კულტურის აღორძინებაში და სამეცნიერო კვლევებში, ეს არის დასკვნა იმისა, რომ საყდრისის ძეგლი არის მნიშვნელოვანი კულტურული ძეგლი“, - აღნიშნა რატიანმა.

შეგახსენებთ, კომპანია „RMG“-ის წარმომადგენლებმა ქუთაისში მდებარე პარლამენტის შენობასთან აქცია გამართეს. მათ აინტერესებთ, რატომ ითხოვენ „თავისუფალი დემოკრატები“ და „ნაციონალური მოძრაობა“ საპარლამენტო საკომისიო კომისიის შექმნას და რა იციან საყდრისის საბადოზე.

„ჩვენ გვაინტერესებს რა უნდათ მათ. გამოვიდნენ და გაგვცენ პასუხები, რატომ უნდათ, რომ 3 000 კაცი, რომელთა უკანაც ოჯახები და შვილები დგანან, ლუკმა-პურის გარეშე დარჩნენ. ჩვენ კი ვიცით, რაც უნდათ. მათ უნდათ, რომ ჭაობში და სიღარიბეში ვიყოთ, მაგრამ ჩვენ არ გვინდა სიცრუეში ცხოვრება. ჩვენ გვინდა მუშაობა და სიმართლით ცხოვრება“, - განაცხადა „არემჯი კოპერის“ თანამშრომელმა გიორგი ნასყიდაშვილმა.