ბრიუსელში ევროკავშირის სახელმწიფოებში საქართველოს ელჩების შეკრება გაიმართა

პოლიტიკა - 18:09, 02 Apr, 2015

564

საქართველოს საგარეო საქმეთა მინისტრის თამარ ბერუჩაშვილის ბრიუსელში ვიზიტის ფარგლებში, გაიმართა შეხვედრა ევროკავშირის წევრ სახელმწიფოებში საქართველოს დიპლომატიური მისიის ხელმძღვანელებთან.

რეგიონულ ამბასადორიალში მონაწილეობა მიიღეს საქართველოს საგარეო საქმეთა მინისტრმა თამარ ბერუჩაშვილმა, ევროპულ და ევრო-ატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ, საგარეო საქმეთა მინისტრის პირველმა მოადგილემ დავით დონდუამ, მინისტრის მოადგილემ გიგი გიგიაძემ და ევროკავშირის ქვეყნებში საქართველოს ელჩებმა.

ამბასადორიალის დღის წესრიგით გათვალისწინებულ საკითხებს შორის იყო „აღმოსავლეთ პარტნიორობის" რიგის სამიტი, ევროკავშირის წევრ სახელმწიფოებთან ორმხრივი თანამშრომლობის გაღრმავება, საქართველოს ოკუპირებულ რეგიონებში ბოლო დროს განვითარებული პროცესები და მის ირგვლივ საერთაშორისო თანამეგობრობის მხარდაჭერის კონსოლიდაცია.

ელჩებთან შეხვედრაზე კიდევ ერთხელ იქნა განხილული საქართველოს მიზნები რიგის აღმოსავლეთ პარტნიორობის სამიტისთვის და მისი მოსამზადებელი სამუშაოები.

ხაზი გაესვა რიგის სამიტამდე დარჩენილ პერიოდში და მის შემდგომ, ევროკავშირის სახელმწიფოებთან ორმხრივი თანამშრომლობის კიდევ უფრო გააქტიურების მნიშვნელობას და პარტნიორ ქვეყნებთან კონსულტაციების ფორმატების გაძლიერებას.

აღინიშნა მაღალი დონის ვიზიტების გაცვლის არსებული დინამიკის შენარჩუნება და მისი კიდევ უფრო გაძლიერების აუცილებლობა.

განსაკუთრებული ყურადღება დაეთმო ევროპის სახელმწიფოებთან ეკონომიკური თანამშრომლობის გაძლიერებას და ინვესტიციების მოზიდვის კუთხით იმ ახალი შესაძლებლობების აქტიურ გამოყენებას, რასაც ევროკავშირთან ღრმა და ყოვლისმომცველი თავისუფალი ვაჭრობის სივრცის კომპონენტი იძლევა.

რეგიონულ ამბასადორიალზე განიხილეს საქართველოს ოკუპირებული აფხაზეთისა და ცხინვალის რეგიონში განვითარებული მოვლენები.