საქართველოს ყოფილი პრემიერის ბიძინა ივანიშვილის თქმით, ბესიკ ხარძიანის მკვლელობა მხოლოდ ერთი ოჯახის ტრაგედია არ არის.

ამის შესახებ ივანიშვილმა საბურთალოს პანთეონში განაცხადა, სადაც მან ბესიკ ხარძიანის ოჯახის წევრებს მიუსამძიმრა.

მისი თქმით, სამართლის წინაშე ყველა აგებს პასუხს.

„მინდა სამძიმარი და თანადგომა გამოუცხადო ოჯახს. მინდა ავღნიშნო, რომ ეს არ გალხავთ მხოლოდ ერთი ოაჯხის ტრაგედია. მოკლე დროში მეორე შემთხვევაა, როდესაც პრინცპულ ადამიანებს, ვინც სამართლიანობის აღდგენისთვის ბრძოლას თავს არ ანებებს, ტერორით უსწორდებიან, ცდილობენ ამით შეგვახსენონ წარსული და საზოგადოებაში შიში გამოიწვიონ. ვარწმუნებ არაადამიანებს, რომ მსგავსი ჩვენს საზოგადოებაში ფეხს ვერ მოიკიდებს და ყველა პასუხს აგებს სამართლის წინაშე“, - განაცხადა ივანიშვილმა.

საბურთალოს პანთეონში ამ წუთებში მოკლული ბიზნესმენის ბესიკ ხარძიანის პანაშვიდი მიმდინარეობს. მას საბურთალოზე მდებარე კერძო სასაფლაოზე დაკრძალავენ.

ბესიკ ხარძიანს 28 მარტს საკუთარ სახლთან ესროლეს. ის მიყენებული ჭრილობების შედეგად საავადმყოფოში გარდაიცვალა. მომხდარზე გამოძიებას პროკურატურა აწარმოებს. ფაქტზე აღძრულია საქმე სისხლის სამართლის კოდექსის 108-ე მუხლით, რაც განზრხა მკვლელობას გულისხმობს.