სპორტული ფედერაციები შეშფოთებას გამოთქვამენ სპორტულ სამყაროში განვითარებული მოვლენების გამო. ამის შესახებ ფედერაციების საინიციატივო ჯგუფის მიერ გავრცელებულ განცხადებაშია ნათქვამი.

„სპორტული ფედერაციები, უაღრეს შეშფოთებას გამოვხატავთ საქართველოს სპორტულ სამყაროში უკანასკნელი დღეების განმავლობაში განვითარებული მოვლენების გამო. ეს ხდება იმ ფონზე, როდესაც ჩვენ არავინ გვაწვდის შესაბამის ინფორმაციას, არ მოგვეცა საშუალება დავსწრებოდით სპორტისა და ახალგაზრდობის საპარლამენტო კომიტეტის სხდომას მისი დახურული ფორმატის მიზეზით“, - ნათქვამია განცხადებაში.

მათი ინფორმაციით, სპორტული ფედერაციები აპოლიტიკურ ორგანიზაციები არიან, თუმცა აქვთ ლეგიტიმური უფლება, რომ სპორტისა და ახალგაზრდობის სამინისტროს მოსთხოვონ, მიმდინარე პროცესებთან დაკავშირებით საქმის კურსში ჩააყენონ და მათი მოსაზრებები მოისმინონ.

როგორც ისინი განმარტავენ, ამ მიზნით 4 აპრილს სასტუმრო „რედისონში“ შეიკრიბებიან კომიტეტის და სამინისტროს წარმომადგენელთა მოსაზრებებს მოისმენენ.

შეგახსენებთ, სპორტის კომიტეტმა შესაძლოა მინისტრის, ლევან ყიფიანის გადაყენების პროცედურა დაიწყოს. როგორც ცნობილია, კანონმდებლები ყიფიანს სპორტის კომიტეტის დახურულ სხდომაზე შეხვდნენ. კომიტეტის წევრის ლუკა კურტანიძის თქმით, დეპუტატებს მინისტრთან ბევრი შეკითხვა აქვთ.