პრეზიდენტის მრჩეველი გიორგი აბაშიშვილი პრემიერის განცხადებას ეხმაურება, სადაც ირაკლი ღარიბაშვილმა განაცხადა, რომ მარგველაშვილი მთავრობის კომპეტენციაში ჩაერია.

ამის შესახებ აბაშიშვილმა „პალიტრა TV“-ის ეთერში განაცხადა.

მისი თქმით, მოსახლეობის მიერ არჩეული პირია და ის უნდა საუბრობდეს და საუბრობს კიდეც იმ საკითხებზე, რომელიც საზოგადოებისთვის მნიშვნელოვანია.

„საქართველოს პარლამენტში პრეზიდენტის გამოსვლა ეს არ არის რომელიმე პოლიტიკური პარტიის მიმართ გაკეთებული გამოსვლა. ეს არის საზოგადოებისადმი მიმართვა. შესაბამისად, ამ საკითხში ყველა სხვა ასპექტი გვერდზე უნდა იყოს გაწეული. აუცილებელია, სახელმწიფოს მეთაური იყოს მაქსიმალურად გულწრფელი იმის შეფასებებში, თუ რა მიღწევები და რა ნაკლოვანებები აქვს ქვეყანას. ერთი საკითხი ნამდვილად მესმის – პრეზიდენტი არის უმაღლესი მთავარსარდალი და ნატოსთან დაკავშირებულ საკითხში მისი ჩარევის ხსენება არ მგონია, რომ კორექტული იყოს“, - აცხადებს აბაშიშვილი.

შეგახსენებთ, პრემიერი გუშინ პრეზიდენტის პარლამენტში გამოსვლას გამოეხმაურა და გიორგი მარგველაშვილი მთავრობის მიმართ უსაფუძვლო კრიტიკაში დაადანაშაულა.