"პრეზიდენტი ამბობდა, რომ ეკონომიკა შენელებულია... ეკონომიკა 5%-ით გაიზარდა"- ხადური

პოლიტიკა - 19:57, 01 Apr, 2015

1914

ფინანსთა მინისტრის თქმით, სტატისტიკის ეროვნული სამსახურის მიერ გამოქვეყნებული მონაცემებით ეკონომიკა 5 %-ით გაიზაედა და ეს ეწინააღმდეგება გიორგი მარგველაშვილის მიერ გაკეთებულ განცხადებას, იმასთან დაკავშირებით, რომ საქართველოში ეკონომიკა შენელებულია.

მთავრობის სხდომის დასრულების შემდეგ ნოდარ ხადურმა პრეზიდენტის მიერ გაკეთებულ სხვა განცხადებებსა უპასუხა და აღნიშნა, რომ ეკონომიკურ საბჭოში მხოლოდ მინისტრები არ არიან, არიან ასევე სხვა უწყებების წარმომადგენლები და ეკონომიკური საბჭო არის ძალიან კარგი ინსტრუმენტი სამუშაო რეჟიმში კომუნიკაციისთვის.

„ეკონომიკური საბჭო არის ძალიან კარგი ინსტრუმენტი, რომ ჩვენ ვიმუშაოთ, გავუზიაროთ ერთმანეთს მოსაზრებები და სამუშაო რეჟიმში გვქონდეს უფრო მეტი კომუნიკაცია. ეკონომიკურ საბჭოში მხოლოდ მინისტრები არ არიან. არიან ასევე სხვა უწყებების წარმომადგენლები და ძალიან მნიშვნელოვანია, რომ ასეთი ტიპის კომუნიკაცია დგება. ეს ძალიან კარგი და აპრობირებული მეთოდია. რაც შეეხება ეკონომიკურ ზრდას, იმ ფონზე, როდესაც პრეზიდენტი ამბობდა, რომ საქართველოს ეკონომიკა შენელებულია, სტატისტიკის ეროვნულმა სამსახურმა ინფორმაცია გამოქვეყნა, რომ ეკონომიკა 5%-ით გაიზარდა,“ - განაცხადა ნოდარ ხადურმა.

შეგახსენებთ, გიორგი მარგველაშვილმა პარლამენტში თავის ყოველწლიურ გამოსვლაში აღნიშნა, რომ ხელისუფლებაში არსებული ათეულამდე საბჭო და სტრუქტურა არსებობს, რომლებიც უკვე არსებული ორგანოების ფუნქციების დუბლირებას ახდენენ. კერძოდ, მინისტრთა კაბინეტში არსებობს შესაბამისი მიმართულების სამინისტრო, იმავდროულად კი, პრემიერის აპარატს დაქვემდებარებული იგივე მიმართულების საბჭო იქმნება, სადაც დარგის მინისტრი რიგით წევრად გვევლინება.