"პრემიერმა ტყუილის დღე მიულოცა საზოგადოებას"- ზურაბ ჯაფარიძე

პოლიტიკა - 18:14, 01 Apr, 2015

1522

"ნაციონალური მოძრაობის“ აღმასრულებელი მდივანი ზურაბ ჯაფარიძე, გაუმჯობესებული ეკონომიკური მდგომარეობის შესახებ პრემიერის მხრიდან გაკეთებულ განცხადებას სპეციალური ბრიფინგით გამოეხმაურა.

„პრემიერმა მოიყვანა ბევრი ციფრები და ისაუბრა იმის შესახებ თუ როგორ გაუმჯობესდა ქვეყანაში ეკონომიკური მდგომარეობა, დღეს არის 1 აპრილი და როგორც ჩანს პრემიერმა ტყუილის დღე მიულოცა საზოგადოებას. ტყუილი არის არა მხოლოდ ის რომ მოიყვანო არასწორი რიცხვები, არამედ ტყუილია ისიც, როდესაც არ საუბრობ იმ რიცხვებზე რომელიც პოლიტიკურად არ გაწყობს“ - განაცხადა ზურაბ ჯაფარიძემ. მისი თქმით ექსპორტში არის 26%-იანი ვარდნა, საქართველოს მოსახლეობას გაუძვირდა სესხი, ამ ხელისუფლების პირობებში ლარი გაუფასურდა 35%-ით, 2015 წლის ბოლო კვარტალში 2013 წლის ბოლო კვარტალთან შედარებით საქართველოს ეკონომიკა დოლარში 35 მილიონით შემცირდა.

„ლარის გაუფასურებამ გაადვილა ბიუჯეტის შევსება და გაართულა მოსახლეობის მდგომარეობა“- განაცხადა ჯაფარიძემ

„პრემიერის დღევანდელმა განცხადებამ დაგვანახა, რომ მთავრობა მოწყვეტილია რეალობას, არ ესმის ხალხის ხმა და ამიტომ გამოსავალი არის ერთი, ეს მთავრობა უნდა წავიდეს“-აცხადებს ენმ-ს აღმასრულებელი მდივანი.