თავდაცვის მინისტრი მინდია ჯანელიძე „თავისუფალ დემოკრატებს“ თავშეკავებისკენ მოუწოდებს.

ამის შესახებ ჯანელიძემ საფრანგეთთან საჰაერო უსაფრთხოებასთან დაკავშირებული ხელშეკრულების თემის კომენტირებისას განაცხადა.

მისი თქმით, რაც უფრო მეტს ილაპარაკებენ ირაკლი ალასანია და მისი პარტიის წევრები ამ საკითხზე, უფრო მეტი ზიანი მიადგება ქვეყანას.

„რაც შეეხება პროცესს, პროცესი მიმდინარეობს ძალიან წარმატებით. ამაზე მეტს ვერ გეტყვით, რადგან იმ ხალხისგან განსხვავებით, ვინც ამ საკითხზე ღიად საუბრობს, მე სხვა პასუხისმგებლობა მაქვს. შესაბამისად, დეტალებზე ვერ ვისაუბრებ. პროცესი მიმდინარეობს წარმატებით, ყველა ნაბიჯი, რომელიც უნდა გადაიდგას, იდგმება. ამიტომ მოვუწოდებ მათ, რომ თავი შეიკაონ განცხადებების გაკეთებისგან და მშვიდად იყვნენ“, - განაცხადა ჯანელიძემ.