,,ხარძიანის მკვლელობა ყველასთვის გზავნილია - სამართლიანობა აღადგინეთ საიქიოში“

პოლიტიკა - 15:10, 01 Apr, 2015

1724

საპარლამენტო უმრავლესობის წევრმა ნუკრი ქანთარიამ განაცხადა, რომ ძალოვანმა უწყებებმა ანტიტერორისტული პრევენციული ღონისძიებები უნდა გაატარონ იმ ადამიანების მიმართ, ვინც დანაშაულს სჩადიან. ნუკრი ქანთარიამ ბიზნესმენ ბესიკ ხარძიანის მკვლელობაზეც ისაუბრა და აღნიშნა, რომ ეს იყო გზავნილი ხელისუფლების და იმ ბიზნესმენების მიმართ, რომლებიც სამართლიანობის აღდგენას მოითხოვენ

„ამ ხელისუფლების მთავარი მონაპოვარია ის, რომ შესაძლებელია ცხოვრება შიშის გარეშე. როგორც სჩანს, შიშის გარეშე ცხოვრება ბოროტმოქმედებმაც დაიწყეს. კოზანოსტრას სტილში ხარძიანი წუთისოფელს გამოასალმეს და ეს არის კიდევ ერთი გზავნილი ჩვენი ხელისუფლების და ყველა იმ დაზარალებული ბიზნესმენების მიმართ, რომ სამართლიანობა აღადგინეთ - მაგრამ მხოლოდ საიქიოში! მიმაჩნია, რომ ამ ყველაფერს ადექვატური პასუხები უნდა გავცეთ.

არ ვიცი, სად იბადება ეს აზრები - საქრათველოში თუ მის საზღვრებს გარეთ, როგორც სჩანს, ეს არის ორგანიზებული ჯგუფები და მათ გამოსავლენად უნდა დაიწყოს ანტიტერირისტული პრევენციული ღონისძიებები და სპეცსამსახურებმა მოახდინონ ადექვატური პასუხის გაცემა. ეს არის მიზანმიმართული, რომ საზოგადეობაში პანიკა დაითესოს. სამართლიანობა აუცილებლად აღდგება“, - განაცხადა ნუკრი ქანთარიამ.