სპორტისა და ახალგაზრდობის მინისტრი თანამდებობიდან წასვლას არ აპირებს.

ამის შესახებ ლევან ყიფიანმა ჟურნალისტებთან საუბრისას განაცხადა.

"საუბარი მქონდა პრემიერთან და ვიცე-პრემიერთან, ასევე მინისტრთა კაბინეტის სხვა წევრებთან. მე ვაგრძელებ მუშაობას ჩვეულ რიტმში. არავის მივცემ უფლებას ვინც არ უნდა იყოს ეს, პარლამენტარი, ოლიმპიური ჩემპიონი თუ სხვა, ხელი აფათუროს სხვადასხვა ფედერაციების სასქმიანობაში. მე ვიქნები ის ადამიანი, ვინც დაიცავს იმას, რითაც ჩვენ მოვედით და რითაც ჩვენ საზოგადოებას პირობა მივეცით, რომ არ ჩავერევით ფედერაციების საქმიანობაში", - განაცხადა ლევან ყიფიანმა.

შეგახსენებთ, სპორტის კომიტეტმა შესაძლოა მინისტრის, ლევან ყიფიანის გადაყენების პროცედურა დაიწყოს. როგორც ცნობილია, კანონმდებლები ყიფიანს სპორტის კომიტეტის დახურულ სხდომაზე შეხვდნენ. კომიტეტის წევრის ლუკა კურტანიძის თქმით, დეპუტატებს მინისტრთან ბევრი შეკითხვა აქვთ.