"საპირწონედ ეს ვიგინდარა დამიყენეს... ორი სეზონია, თეატრში არ მივსულვარ- პროტესტი გამოვაცხადე"

პოლიტიკა - 12:01, 01 Apr, 2015

6799

მსახიობი და საპარლამენტო უმრავლესობის დეპუტატი ზაზა პაპუაშვილი თეატრის კანონზე და იმ ბრალდებებზე საუბრობს, რასაც ამ კანონის გარშემო მას თეატრის სფეროს წარმომადგენლები უყენებდნენ.

„დღევანდელი სამხატვრო ხელმძღვანელები პატარა ფეოდალები არიან, რომლებიც თეატრში თავიანთ სამკვიდრებელს იკეთებენ და არტისტების, დასის უფლებები ილახება. ამ კანონით კი თეატრებს თავისუფალ, კონკურენტუნარიან გარემოს ვთავაზობდით. დღეს თეატრებში სამხატვრო ხელმძღვანელების სახანოები, საამპარტავნოებია და ყველაფერი მათი სურვილებით წყდება. ძველი კანონის გასაუქმებლად ქანთარიას ვეწინააღმდეგებოდი. ჩემი უზარმაზარი შეცდომაა, რომ კომპრომისზე წავედი.

კომიტეტში ყველამ მხარი დამიჭირა, წინააღმდეგი მარტო ერთი კაცი ნუკრი ქანთარია იყო. ქანთარიასთან ჩვეულებრივი, ადამიანური საუბარი, კამათი მქონდა, არ მინდოდა, ეს ჩვენს გარეთ გასულიყო, მაგრამ ურთიერთობა ზღვარს გასცდა- ქანთარიამ ჩათვალა, რომ მარტო მას უნდა ჰკითხონ თეატრთან დაკავშირებული საკითხები“- აცხადებს პაპუაშვილი.

ზაზა პაპუაშვილის განცხადებით, მას არ სურს რომ სხვებმა იჭორაონ იმასთან დაკავშირებით აქვს თუ არა დაპირისპირება რუსთაველის თეატრის დირექტორ გია თევზაძესთან.

„საუბრის ჭორებზე აგება არ შემიძლია- ვისთან რა დაპირისპირება მაქვს, ეს არც ნუკრი ქანთარიას განსახილველია და მით უმეტეს, არც ქეთი დოლიძის, რომელსაც საკუთარი თავის გარდა არაფერი აღელვებს.“- აღნიშნავს დეპუტატი.

პაპუაშვილის თქმით, ის რუსთაველის თეტრის დირექტორად გია თევზაძის დანიშვნას ეწინააღმდეგებოდა და ამის შესახებ რობერტ სტურუასთანაც ქონდა საუბარი, რომლისგანაც პირობა მიიღო რომ თევზაძე ამ თანამდებობაზე არ დაინიშნებოდა. თუმცა როგორც ზაზა პაპუაშვილი აღნიშნავს სტურუამ საბოლოოდ მისი თხოვნა აღარ გაითვალისწინა დათევზაძე აღნიშნულ თანამდებობაზე დაინიშნა, რის შემდეგაც ზაზა პაპუაშვილი პროტესტის ნიშნად რუსთაველის თეატრში აღარ მიდის.

„გია თევზაძე მაინც დაინიშნა. თავისი მანერით-სტურუა მიდის მოსკოვში და უცებ, შიდა ბრძანებით, ინიშნება გია თევზაძე. გადამეკეტა გონება, თეატრში მივედი და ვინ სად გარბოდა, კაცმა არ იცის. ერთი ფიზიკურად არ შევეხე, თორემ რასაც მასზე ვფიქრობდი ყველაფერი პირში ვუთხარი. მერე სტურუას ვეკითხები, ეს რატომ გააკეთე-მეთქი, ბოდიში მოიხადა, ეს ვითარება გამოსწორდებაო და წავიდა. მე უკვე ორი სეზონი სრულდება, თეატრში არ მივსულვარ- პროტესტი გამოვაცხადე ...

თუ ყველას ფეხებზე ჰკიდია, რომ სეზონნახევარია, თეატრში არ ვარ და საპირწონედ ეს ვიგინდარა დამიყენეს. მაშინ ჯერ ჩემი თავისთვის და ჩემი გაკეთებულისთვის მიმიფურთხებია. ერთ ღილაკს დავაჭერ ტვინში თითს და მთელ მახსოვრობას წავშლი“- აცხადებს ზაზა პაპუაშვილი.

გაზეთი „ვერსია“